تاثیر،۲ دسمبر۲۰۲۳:- ایس -ایم- حسن
نئی دہلی، 02 دسمبر: وزیر اعظم نریندر مودی نے آج (ہفتہ) بھارتیہ جنتا پارٹی (بی جے پی) کے قومی صدر جے پی نڈا کو ان کے 63 ویں یوم پیدائش پر مبارکباد دی۔ اس موقع پر وزیراعظم نے ان کی تنظیمی صلاحیتوں کی تعریف کی۔
اس موقع پر اپنے مبارکبادی پیغام میں وزیر اعظم مودی نے کہا،’انہوں نے تنظیمی مہارت میں ایک مثال قائم کی ہے۔ ان کے سادہ اور گرمجوشی بھرے مزاج نے انہیں مقبول بنایا ہے۔ میں نے انہیں گزشتہ کئی دہائیوں میں پارٹی کے لیے سخت محنت کرتے دیکھا ہے۔ انہوں نے خود کو ایک بہت اچھے ایم ایل اے، ایم پی اور وزیر کے طور پر بھی قائم کیا۔ عوام کی خدمت میں ان کی لمبی اور صحت مند زندگی کے لیے دعا گو ہوں‘۔
مرکزی وزیر داخلہ امت شاہ نے بھی نڈا کو ان کی سالگرہ کی مبارکباد دی۔ ٹویٹر پر شیئر کیے گئے اپنے پیغام میں انہوں نے کہا کہ جے پی نڈا اپنی محنت اور تنظیمی صلاحیتوں سے آپ پارٹی کو وسعت دینے اور مضبوط کرنے میں اہم کردار ادا کر رہے ہیں۔ میں ایشور سے آپ کی اچھی صحت اور لمبی عمر کی دعا کرتا ہوں۔
لوک سبھا اسپیکر اوم برلا، مرکزی وزیر نتن گڈکری، وزیر دفاع راج ناتھ سنگھ سمیت کئی لوگوں نے بھی نڈا کو ان کی سالگرہ پر مبارکباد دی ہے۔ جے پی نڈا نے بھی سبھی کا شکریہ ادا کیا ہے۔ انہوں نے وزیراعظم کا شکریہ ادا کرتے ہوئے کہا کہ آپ کی رہنمائی میں ملک اور پارٹی کی خدمت کرنا میری خوش قسمتی ہے۔ قوم کی خدمت اور فلاح و بہبود کے لیے آپ کی لگن ہمیشہ متاثر کن رہی ہے۔ آپ کی قابل قیادت میں بی جے پی کا ہر کارکن ہندوستان کو ایک ترقی یافتہ ملک بنانے کے لیے پرعزم ہے۔