تاثیر،۱۰ دسمبر۲۰۲۳:- ایس -ایم- حسن
جنج گیر (چھتیس گڑھ)،10؍دسمبر:: چھتیس گڑھ کے جنجگیر-چمپا ضلع میں اتوار کو ایک المناک حادثہ پیش آیا۔ یہاں ایک ٹرک اور کار کے درمیان زبردست تصادم ہوا۔ اس حادثے میں کار میں سفر کر رہے ایک نوبیاہتا جوڑے سمیت پانچ افراد ٹرک کی زد میں آ کر ہلاک ہو گئے۔ پولیس نے یہ اطلاع دی۔ پولیس حکام نے بتایا کہ یہ واقعہ صبح سویرے ملمولا تھانہ علاقے کے تحت پکریہ جھولن گاؤں کے قریب اس وقت پیش آیا جب متاثرہ افراد شادی کے بعد شیو رنائن ٹاؤن سے بلودہ واپس آرہے تھے۔ابتدائی معلومات کے مطابق، ضلع کے بلودہ گاؤں کے رہنے والے شبھم سونی کی شادی ہفتہ کی رات شیو نرائن قصبہ میں ہوئی تھی۔ دولہا، دلہن اور خاندان کے تین دیگر افراد اپنی گاڑی میں واپس بلودہ جا رہے تھے کہ مخالف سمت سے آنے والے ٹرک سے ان کی ٹکر ہو گئی، جس کے نتیجے میں دلہن سمیت کار میں سوار چار افراد موقع پر ہی جاں بحق ہو گئے۔دولہا شدید زخمی، ہسپتال پہنچنے پر دم توڑ گیا۔حکام نے بتایا کہ شدید زخمی دولہے کو ہسپتال لے جایا گیا، جہاں اس کی موت ہو گئی۔ انہوں نے کہا کہ مرنے والوں میں دولہے کے والد اوم پرکاش سونی بھی شامل ہیں جو گاڑی چلا رہے تھے۔ واقعہ کی اطلاع ملتے ہی پولیس کی ٹیم موقع پر روانہ کی گئی اور لاشوں کو پوسٹ مارٹم کے لیے بھیج دیا گیا۔پولیس حکام کا کہنا ہے کہ ٹرک ڈرائیور کا سراغ لگانے کی کوشش کی جا رہی ہے جو واقعہ کے بعد اپنی گاڑی چھوڑ کر موقع سے فرار ہو گیا۔