تاثیر،۲۱ دسمبر۲۰۲۳:- ایس -ایم- حسن
لکھنؤ، 21 دسمبر : سماج وادی پارٹی کے قومی صدر اکھلیش یادو نے کہا ہے کہ بی جے پی حکومت نے ریاست کے صحت کے نظام کو برباد کر دیا ہے۔ دارالحکومت لکھنؤ کے بڑے اسپتالوں سے لے کر ضلع اسپتال تک بدانتظامی کا شکار ہیں۔ بعض مقامات پر مریضوں کو علاج نہیں مل رہا اور بعض مقامات پر مناسب سہولتیں نہیں ہیں۔
اپنے پورے دور میں بی جے پی حکومت نے ایک بھی ضلع سطح کا اسپتال نہیں بنایا جہاں غریبوں کا مفت علاج ہو سکے۔ نفرت کے احساس کی وجہ سے بی جے پی حکومت نے سماج وادی حکومت کے دوران بنائے گئے اسپتالوں اور ٹراما سینٹروں کو نظر انداز کیا۔ وزیراعلیٰ صحت کی خدمات کے حوالے سے جھوٹے دعوے کرتے ہیں۔ حکومت عوام کو گمراہ کرنا بند کرے۔
بی جے پی حکومت میں مریضوں کو 108 ایمبولینس سروس تک نہیں مل پا رہی ہے۔ پورا نظام کرپشن کا شکار ہو چکا ہے۔ سماج وادی حکومت میں 108 اور 102 مفت ایمبولینس خدمات شروع کی گئی تھیں لیکن بی جے پی حکومت مریضوں کو ایمبولینس تک فراہم نہیں کر پا رہی ہے۔ اسپتالوں اور میڈیکل کالجوں میں ڈاکٹروں، پروفیسروں اور دیگر وسائل کی خاطر خواہ تعداد نہیں ہے۔ حکومت طبی اداروں میں کام کرنے والے ملازمین کو تنخواہیں ادا کرنے کے قابل نہیں جس کی وجہ سے آئے روز احتجاج اور ہڑتال کی صورتحال پیدا ہو گئی ہے۔ اس کا خمیازہ ریاست کے غریب عوام، مریض اور ان کے اہل خانہ بھگت رہے ہیں۔