تاثیر،۱۹ جنوری۲۰۲۴:- ایس -ایم- حسن
غزہ،19جنوری:اسرائیلی وزیر دفاع یوآو گیلنٹ نے لبنان کی سرحد پر سکیورٹی کی صورتحال کے بگڑنے سے نمٹنے کے لیے تیار رہنے کی ضرورت پر زور دیتے ہوئے کہا ہے کہ تل ابیب ایک ایسے سیاسی تصفیے کو ترجیح دیتا ہے جو سلامتی کی صورتحال میں تبدیلی کے بعد آبادی کو شمال کی طرف واپس جانے کا موقع فراہم کرے۔
وزیر دفاع یوآو گیلنٹ نے فوجی مہم کو وسعت دینے کے لیے شمالی سیکٹر کی تیاری کے بارے میں زمینی صورت حال کا جائزہ لیا۔ جس میں دیگر چیزوں کے ساتھ ساتھ شمال کے رہائشیوں کو ان کے گھروں کو لوٹنے کے عمل کی پیش رفت پر توجہ مرکوز کی گئی۔گیلنٹ نے اس بات پر بھی زور دیا کہ اسرائیل ایک سیاسی حل تک پہنچنے کو ترجیح دیتا ہے جو رہائشیوں کو فوجی ذرائع سے ان کے گھروں کو واپس کرنے کے بجائے ان کی پرامن واپسی کی اجازت دے۔گیلنٹ کے بیانات لبنانی حکام کے ساتھ اس بات کی تصدیق کے ساتھ سامنے آئے ہیں کہ ایرانی حمایت یافتہ حزب اللہ نے سرحد کے اس پار اسرائیل کے ساتھ جاری لڑائی کو پرسکون کرنے کے لیے واشنگٹن کی تجاویز کو مسترد کر دیا ہے۔ ان میں اپنے جنگجوؤں کو سرحد سے ہٹانا بھی شامل ہے۔حزب اللہ کی سوچ سے واقف ایک سینئر لبنانی عہدیدار نے کہا کہ تنظیم ان تجاویز کو سننے کے لیے تیار تھی لیکن ساتھ ہی اس نے اس بات پر زور دیا کہ حزب اللہ نے لبنان کے لیے امریکی خصوصی ایلچی آموس ہوچسٹین کے دورے کے دوران پیش کیے گئے خیالات پر غور کیا۔اس تردید اورغزہ کی حمایت میں حزب اللہ کی طرف سے فائر کیے گئے میزائل کے باوجود ایک اور لبنانی عہدیدار اور ایک سکیورٹی ذرائع نے اطلاع دی ہے کہ ایرانی حمایت یافتہ مسلح گروپ کو سفارتی رابطے جاری رکھنے ہوں گے تاکہ جنگ کو پھیلنے سے روکا جا سکے۔
جہاں تک امریکا کی طرف سے پیش کی گئی تجاویز یا نظریات کا تعلق ہے تو تین لبنانی ذرائع اور ایک امریکی اہلکار نے بتایا ہے کہ پچھلے ہفتے پیش کی جانے والی تجاویز میں سے ایک یہ تھی کہ اسرائیل کی جانب سے لبنان کی سرحد پر سخت کارروائیاں نہیں کی جائیں گی اور اسرائیلی فوج غزہ میں گہرائی میں اپنی کارروائیوں پر توجہ دے گی۔جبکہ ایک اور تجویز میں یہ بات شامل تھی کہ حزب اللہ اپنے جنگجوؤں کو سرحد سے سات کلومیٹر دور لے جائے۔ تین میں سے دو لبنانی عہدیداروں نے وضاحت کی۔ اسرائیل نے پہلے مطالبہ کیا تھا کہ وہ 30 کلومیٹر دور دریائے لیتانی میں منتقل ہو جائے جیسا کہ 2006 میں اقوام متحدہ کی ایک قرارداد میں کہا گیا تھا۔لیکن حزب اللہ نے ان دونوں تجاویز کو غیر حقیقی قرار دیتے ہوئے مسترد کر دیا۔تاہم، پارٹی نے اشارہ دیا کہ ایک بار غزہ میں جنگ ختم ہونے کے بعد، حکام کے مطابق، لبنان متنازع سرحدی علاقوں کے حوالے سے ثالثوں کے ذریعے ایک معاہدے پر بات چیت کرنے کے خیال کے لیے کھلا ہو سکتا ہے۔اسی تناظر میں حزب اللہ کے ایک سینئر اہلکار نے نام ظاہر نہ کرنے کی درخواست پر رائیٹرز کو بتایا کہ “غزہ پر جنگ کے بعد ہم خطرے کو موقع میں تبدیل کرنے کے لیے لبنانی مذاکرات کاروں کی حمایت کے لیے تیار ہیں لیکن انہوں نے مخصوص تجاویز پر توجہ نہیں دی۔غزہ پر اسرائیلی جنگ شروع ہونے کے بعد فلسطینی پٹی سے ملحق اسرائیلی بستیوں اور فوجی اڈوں پر حماس کے حملے کے بعد لبنان اسرائیل سرحد پر محاذ آرائی اور جھڑپیں کم نہیں ہوئیں۔ ایایف پی کے مطابق سرحد پر باہمی تصادم کے نتیجے میں اب تک کم از کم 190 افراد ہلاک ہو چکے ہیں جن میں حزب اللہ کے 140 سے زائد ارکان اور تین صحافی شامل ہیں۔گذشتہ سات اکتوبر سے شروع ہونے والی تقریباً روزانہ جھڑپوں کے نتیجے میں سرحدی قصبوں سے تقریباً 76,000 لبنانی بے گھر ہوئے، جب کہ اسرائیلی فوج نے اپنی طرف سے نو فوجیوں سمیت 14 افراد کی ہلاکت کا اعتراف کیا۔