تاثیر،۸مارچ ۲۰۲۴:- ایس -ایم- حسن
کانپور، 07 مارچ: انفورسمنٹ ڈائریکٹوریٹ (ای ڈی) کی ٹیم نے جمعرات کی صبح سماج وادی پارٹی (ایس پی) کے ایم ایل اے عرفان سولنکی اور ان کے قریبی رشتہ داروں کے یہاں چھاپہ مارا۔ سب سے پہلے چھ گاڑیاں ایم ایل اے کی جاجمؤ رہائش گاہ پر پہنچیں اور چھاپہ مار کارروائی شروع کی۔ عرفان کے علاوہ ای ڈی کی ٹیم نے ان کے بھائی رضوان اور ارشد کے گھروں پر بھی چھاپے مارے ہیں۔ قابل ذکر ہے کہ ایس پی ایم ایل اے عرفان گزشتہ ایک سال سے جیل میں ہیں۔
جمعرات کی صبح اتر پردیش ہیڈکوارٹر، لکھنؤ سے انفورسمنٹ ڈائریکٹوریٹ کی چھ ٹیمیں ایس پی ایم ایل اے عرفان سولنکی کی بیکن گنج رہائش گاہ اور ان کے بھائی ارشد اور بلڈر حاجی وصی کے گھر پہنچیں اور چھاپہ ماری شروع کی۔ گھر میں موجود تمام ارکان کے موبائل فون ضبط کر لیے گئے ہیں۔
ای ڈی کی ٹیمیں ایم ایل اے کے بھائی ارشد سے پوچھ گچھ کر رہی ہیں اور ان کے گھر میں نصب سی سی ٹی وی کیمرے بھی بند کر دیے گئے ہیں۔ چھاپے کے دوران ہر موڑ پر پولیس فورس بھی تعینات ہے۔
قابل ذکر ہے کہ ایس پی ایم ایل اے عرفان زمین پر قبضے سمیت کئی دیگر معاملات میں مہاراج گنج جیل میں ہیں۔ وہ راجیہ سبھا انتخابات میں بھی ووٹ نہیں ڈال سکے تھے۔ آتش زنی اور ضابطہ اخلاق کی خلاف ورزی کے کیس میں عرفان سولنکی کے خلاف فیصلہ 14 مارچ کو سنایا جائے گا۔