تاثیر،۹مارچ ۲۰۲۴:- ایس -ایم- حسن
دھرم شالہ، 08 مارچ : دھولادھار کی وادیوں میں ٹیسٹ کرکٹ سے لطف اندوز ہونے کے لیے آنے والے کرکٹ شائقین میں انگلینڈ کے تماشائی بھی پیچھے نہیں ہیں۔ بھارت اور انگلینڈ کے درمیان جاری ٹیسٹ میچ سے لطف اندوز ہونے کے لیے انگلش شائقین کی بڑی تعداد دھرم شالہ پہنچ گئی ہے۔ یہ کرکٹ کے شائقین اپنی ٹیم کو سپورٹ کرنے کے لیے ٹیم کے ساتھ تمام مقامات پر پہنچ رہے ہیں۔ ان مہمانوں میں سے ایک پیٹرک ہیں، جو گزشتہ پانچ دہائیوں سے اپنی ٹیم کے ساتھ ہندوستان سمیت کئی دوسرے ممالک کا مسلسل دورہ کر رہے ہیں۔
اگرچہ پیٹرک، جن کی عمر 70 سال سے زیادہ ہے، چلنے -پھرنے سے تھوڑا نابلد ہیں، اس کے باوجود وہ اپنی ٹیم کی حوصلہ افزائی کے لیے دھرم شالہ پہنچ گئے ہیں۔ ہاتھ میں اسٹک لے کر وہ اپنے ایک دوست کے ساتھ کرکٹ اسٹیڈیم پہنچے۔ پیٹرک کا کرکٹ سے جنون کا اندازہ اس بات سے ہوتا ہے کہ وہ 1973 سے کرکٹ میچ دیکھنے کے لیے اپنی ٹیم کے ساتھ جا رہے ہیں۔
انگلینڈ کے شہر آکسفورڈ کے رہنے والے پیٹرک کا کہنا ہے کہ بھارت میں اچھے کھلاڑیوں کی کمی نہیں ہے۔ ہندوستانی ٹیم اس وقت بہت اچھا کھیل رہی ہے۔ اس کے پاس نوجوان کرکٹرز ہیں جو تکنیکی طور پر مضبوط ہیں۔ ان کا کہنا ہے کہ انہوں نے اس سیریز کے تمام میچ دیکھے ہیں اور حیدرآباد کے بعد انہیں دھرم شالہ کرکٹ اسٹیڈیم اور یہاں کے لوگوں ان کو سب سے زیادہ پسند آئے ہیں ۔ انہوں نے دھرم شالہ کے قدرتی حسن کی بھی تعریف کی ہے۔ ان کا کہنا ہے کہ برف سے بھرے پہاڑوں اور اردگرد کی خوبصورتی نے انہیں بہت اپنی طرف متوجہ کیا ہے۔
ہندوستانی ٹیم فاتح بننے کی مستحق ہے: ایلین
وہیں انگلینڈ کے شہر ڈربی سے تعلق رکھنے والی کرکٹ کی 71 سالہ ایلین بھی کرکٹ کی دیوانی ہے۔ ایلین نے اپنی زندگی میں اب تک دنیا کے تمام کرکٹ کھیلنے والے ممالک کا دورہ کیا ہے، جس میں انہیں ویسٹ انڈیز بہت پسند آیا۔ وہ پہلی بار دھرم شالہ پہنچی ہیں لیکن یہاں آنے کے بعد وہ دھولادھار اور اسٹیڈیم کی خوبصورتی کی قائل ہوگئی ہیں ۔ ان کا کہنا ہے کہ ہندوستانی ٹیم اس وقت بہت اچھا کھیل رہی ہے جبکہ انگلینڈ کی ٹیم کی کارکردگی کے اعتبار سے بہت نیچے ہے۔ انہوں نے کہا کہ اینڈرسن جیسے ورلڈ کلاس تیز گیندباز کی کارکردگی بھی اس سیریز میں انتہائی خراب رہی ہے۔