تاثیر،۱۸ اپریل ۲۰۲۴:- ایس -ایم- حسن
ممبئی ، 18 اپریل: انفورسمنٹ ڈائریکٹوریٹ (ای ڈی) کی ٹیم نے جمعرات کو صنعتکار راج کندرا اور ان کی اہلیہ فلم اداکارہ شلپا شیٹی کے 97.79 کروڑ روپے کے اثاثے ضبط کر لیے۔ ان جائیدادوں میں شلپا کے نام پر جوہو میں ایک فلیٹ، راج کندرا کے نام پر پونے میں ایک بنگلہ اور ایکویٹی شیئرز وغیرہ شامل ہیں۔ ای ڈی کی ٹیم معاملے کی جانچ کر رہی ہے۔
ای ڈی ذرائع کے مطابق شلپا شیٹی کے شوہر رپسوڈن کندرا عرف راج کندرا کی 97.79 کروڑ روپے کی غیر منقولہ اور منقولہ جائیداد کو عارضی طور پر ضبط کر لیا گیا ہے۔ یہ کارروائی پی ایم ایل اے 2002 کی دفعات کے تحت کی گئی ہے۔ اس کارروائی سے فلم انڈسٹری میں خوف و ہراس پھیل گیا ہے۔ تاہم ابھی تک اس معاملے میں شلپا شیٹی یا راج کندرا کی جانب سے کوئی ردعمل سامنے نہیں آیا ہے۔
قابل ذکر ہے کہ راج کندرا کو ممبئی پولیس نے فحش فلم بنانے کے الزام میں گرفتار کیا تھا۔ اس کے بعد ای ڈی پریونشن آف منی لانڈرنگ ایکٹ (PMLA ایکٹ) کے تحت راج-شلپا جوڑے کے خلاف تحقیقات کر رہی ہے۔