تاثیر۴ جون ۲۰۲۴:- ایس -ایم- حسن
کولکاتا، 4 جون : کولکاتا پولیس نے انتخابی نتائج کے اعلان کے بعد تشدد کے امکان کے پیش نظر تیاریاں کی ہیں۔ تشدد کو روکنے اور ناخوشگوار واقعات سے بچنے کے لیے، کولکاتا کے پولیس کمشنر ونیت گوئل نے منگل کو مختلف تھانوں کو خصوصی ہدایات بھیجیں۔ذرائع کے مطابق پولیس کمشنر ونیت گوئل نے پہلے ہی شہر کے ہر تھانے کے افسر انچارج اور ایڈیشنل انچارج کو حکم جاری کر دیا ہے۔ ہدایات کے مطابق ووٹنگ کے بعد علاقے میں احتیاطی تدابیر اختیار کی جائیں۔ بتایا گیا ہے کہ اس معاملے میں کولکاتا پولیس کی ایک بٹالین کا استعمال کیا جائے گا۔ پولیس کی مناسب نفری رکھنے کو بھی کہا گیا ہے۔ کہیں بھی کوئی ناخوشگوار واقعہ پیش آئے تو انچارج آفیسر اور ایڈیشنل انچارج کو فوری طور پر موقع پر پہنچنے کو کہا گیا ہے۔ اینٹی رائوڈی اسکواڈ کے اہلکار تھانے میں موجود ہوں گے۔ اگر ہنگامہ آرائی کی صورتحال قابو سے باہر ہوتی ہے تو سڑکوں پر ریڈیو فلائنگ اسکواڈ بھی تعینات کیے جائیں گے۔یہ بھی حکم دیا گیا ہے کہ ووٹنگ کے بعد کچھ دنوں تک ہر تھانے میں اضافی پولیس نفری رکھی جائے۔ ریڈیو فلائنگ اسکواڈ کی بھاری نفری تھانے کے باہر تعینات رہے گی۔ تھانوں میں اضافی نفری رکھی جارہی ہے۔ بڑی تعداد میں خواتین پولیس کو بھی تعینات کیا جا رہا ہے۔ لال بازار میں کولکاتا پولیس ہیڈکوارٹر نے یہ بھی ہدایت دی ہے کہ تھانوں کے انچارج افسران کو چاہیے کہ وہ ضرورت پڑنے پر خواتین پولیس اہلکاروں کا مناسب استعمال کریں۔