تاثیر۲۴ جولائی ۲۰۲۴:- ایس -ایم- حسن
جموں, 24 جولائی :جموں و کشمیر کے لیفٹیننٹ گورنر منوج سنہا نے کہا کہ کچھ لوگ یو ٹی میں بڑھتی ہوئی سیاحت کو ہضم نہیں کر سکتے اور یہاں تناؤ کو ہوا دینے کا کام کرتے ہیں، ان سے اسی کے مطابق نمٹا جائے گا اور اگلے دو سے تین ماہ میں حالات دوبارہ معمول پر آ جائیں گے۔ایل جی نے کہا کہ یہ سچ ہے کہ کچھ لوگ سکون کو ہضم نہیں کر سکتے۔ ماضی میں بھی ان سے نمٹا گیا اور اسی کے مطابق نمٹا جائے گا۔ مجھے یقین ہے کہ اگلے دو سے تین مہینوں میں صورتحال دوبارہ معمول پر آجائے گی۔ اْنہوں نے کہا کہ جموں و کشمیر کے لئے پارلیمنٹ میں پیش کردہ بجٹ سیاحت کے شعبے کا احاطہ کرتا ہے لیکن کچھ لوگ جموں و کشمیر میں پرامن ماحول کو خراب کرنے کی کوشش کر رہے ہیں۔ مرکزی وزیر خزانہ نرملا سیتا رمن کی طرف سے جموں و کشمیر کے لیے پارلیمنٹ میں پیش کیے گئے بجٹ کے بارے میں، ایل جی نے کہا کہ بجٹ جامع ہے اور اس میں جموں و کشمیر کے تمام شعبوں بشمول سیاحت کا احاطہ کیا گیا ہے۔ “اس کا مقصد جموں و کشمیر کے خدشات کو دور کرنا اور ماحولیات کے تحفظ کے لیے نامیاتی کاشتکاری کو فروغ دینا ہے۔ اور نوجوانوں کے لیے روزی روٹی کے نئے مواقع کھولنا بھی ہے۔