تاثیر 20 اکتوبر ۲۰۲۴:- ایس -ایم- حسن
ممبئی ، 20 اکتوبر: بھارتیہ جنتا پارٹی نے اتوار کو 288 رکنی مہاراشٹر اسمبلی کے انتخابات کے لیے اپنے 99 امیدواروں کی پہلی فہرست جاری کی ہے، نائب وزیر اعلیٰ دیویندر فڈنویس کو ان کی روایتی ناگپور ساؤتھ ویسٹ سیٹ سے میدان میں اتاراگیا ہے۔ اس فہرست میں ممبئی بی جے پی کے صدر آشیش سیلار کا نام بھی شامل ہیں، جو باندرا ویسٹ سیٹ سے میدان میں اترے ہیں، اور پارٹی کے سینئر لیڈر اور لوک سبھا ایم پی نارائن رانے کے بیٹے نتیش رانے، کنکاولی سے میدان میں اترے ہیں، اس سیٹ سے وہ اس وقت اسمبلی میں نمائندگی کرتے ہیں۔بی جے پی نے اپنے مہاراشٹر کے صدر چندر شیکھر باونکولے کو کامٹھی سے، سابق ریاستی صدر چندرکانت پاٹل کوتھروڈ سے اور سابق وزیر اعلی اشوک چوہان کی بیٹی سریجایا چوان کو بھوکر سے میدان میں اتارا ہے۔بی جے پی ریاست میں تقریباً 150 سیٹوں پر مقابلہ کرنا چاہتی ہے لیکن وہ اپنے اتحادیوں وزیر اعلیٰ ایکناتھ شندے کی قیادت والی شیو سینا اور نائب وزیراعلیٰ اجیت پوار کی زیرقیادت نیشنلسٹ کانگریس پارٹی کے ساتھ نشستوں کی تقسیم میں الجھی ہوئی ہے۔