سہرسہ(سالک کوثر امام) ضلع کے تحت سون ورشا نگر پنچایت کے مین بازار میں واقع دیہد چوک کے قریب این ایچ 107 کی حالت تشویشناک ہوگئی ہے۔ پانی کی نکاسی کے لیے ٹھیکیدار کی جانب سے تعمیر کیا گیا نامکمل نالہ پریشانی کی وجہ بن گیا ہے۔ این ایچ 107 پر نالے کا گندا پانی جمع ہونے سے سڑک ٹوٹ پھوٹ کا شکار ہو گئی ہے جس کی وجہ سے گاڑیاں حادثات کا شکار ہو رہی ہیں۔ زیادہ تر گاڑیاں صرف ایک لین استعمال کر رہی ہیں۔ جس کی وجہ سے بازار میں ٹریفک جام کا مسئلہ بنا رہتا ہے۔ مقامی دکاندار پریتم چودھری، چندیشوری شاہ، بندیشوری شاہ، پربھو مکھیا، محمد معین عالم، بدھو چودھری اور منوج سورنکار نے بتایا کہ ٹھیکیدار نے نالے کے پانی کی نکاسی کا کوئی انتظام نہیں کیا ہے۔ منوری چوک کی حالت بھی تشویشناک ہے۔ منگل کی رات کی بارش نے کچی لنک سڑک کو دلدل میں تبدیل کر دیا ہے۔ یہ سڑک سمری بختیار پور سب ڈویژن علاقے کی مرکزی سڑک ہے۔ ٹریفک میں خلل کے باعث منوری چوک کے دکانداروں کا کاروبار متاثر ہوا ہے۔ راجیو کمار سنگھ، اظہار عالم، دیپک ساہ اور روشن سنگھ نے بتایا کہ لنک روڈ گزشتہ پانچ سالوں سے زیر تعمیر ہے۔