تاثیر 18 جولائی ۲۰۲۵:- ایس -ایم- حسن
پٹنہ، 18 جولائی :بہار کے مشرقی چمپارن ضلع کے ہیڈکوارٹر موتیہاری میں وزیر اعلی نتیش کمار نے جمعہ کے روز لالو-رابڑی کے دور کی یاد دلاتے ہوئے کہا کہ آپ سب جانتے ہیں کہ پہلے کیا صورتحال تھی۔ 2005 سے پہلے یہاں کوئی کام نہیں ہوا تھا۔
وزیر اعلیٰ نتیش نے آج وزیر اعظم کے موتیہاری جلسہ عام میں اپنے خطاب میں کہا کہ جب نومبر 2005 میں بی جے پی اور جے ڈی یو کی حکومت بنی،تب سے لیکر 20 سال سے ہم لوگ کام کر رہے ہیں۔ انہوں نے کہا کہ بہار میں مرکزی حکومت اور ریاستی حکومت کی طرف سے عوام کے مفاد میں کافی کام کیا جا رہا ہے۔ انہوں نے کہا کہ سات نشچے-2 کے تحت نوجوانوں کو 10 لاکھ سرکاری نوکریاں دی گئی ہیں اور 29 لاکھ لوگوں کو روزگار دیا گیا ہے۔ اب آئندہ 5 سالوں میں ایک کروڑ نوجوانوں کو روزگار اورنوکری دیا جائے گا۔
نتیش کمار نے کہا کہ پہلے ان لوگوں (لالو-رابڑی) نے کوئی پیسہ نہیں لگاتے تھے۔ ہم لوگوں نے آہستہ آہستہ ترقی کے لیے رقم میں اضافہ کیا۔ ہم سب کام کر رہے ہیں۔ مرکزی حکومت کی تعریف کرتے ہوئے انہوں نے کہا کہ کافی کام ہوا ہے۔ تمام شعبوں میں تیزی سے کام جاری ہے۔ تعلیم اور صحت پر بہت کام ہوا ہے۔ پل، سات عزائم، ہر گھر میں بجلی، بیت الخلا، ٹولوں کو پکی سڑکوں سے جوڑنے پر کام کیا گیا ہے۔