تاثیر 25 جولائی ۲۰۲۵:- ایس -ایم- حسن
مشرقی سنگھ بھوم، 25 جولائی: مانگو پل سے سورن ریکھا ندی میں چھلانگ لگانے والی خاتون کی شناخت ہو گئی ہے۔ جمعہ کو اس کی لاش برسان نگر لوپنگ ڈیہ ندی کے علاقے سے برآمد ہوئی تھی۔ جاں بحق خاتون کا نام نازیہ پروین (20) ہے۔ پولیس کے مطابق نازیہ کی چند سال قبل شادی ہوئی تھی تاہم شوہر سے طلاق لینے کے بعد وہ اپنے خاندان سے الگ رہ رہی تھی۔ فی الحال وہ کہاں اور کس کے ساتھ رہ رہی تھی، اس بارے میں معلومات اکٹھی کی جا رہی ہیں۔
جمعرات کی سہ پہر خاتون کے دریا میں چھلانگ لگانے کے واقعے کے بعد پورے شہر میں یہ بات موضوع بحث بن گئی کہ یہ خاتون کون تھی اور اس نے ایسا قدم کیوں اٹھایا؟ پولیس نے موقع سے اس کا برقعہ اور چپل برآمد کر لیا۔ اس کے بعد غوطہ خوروں کی مدد سے اس کی تلاش شروع کی گئی تاہم دریا میں بارش کے پانی کی وجہ سے تیز بہاو اور طغیانی کی وجہ سے سرچ آپریشن مشکل ہوگیا۔ آخر کار جمعہ کو اس کی لاش برآمد ہوئی۔