تاثیر 08 اگست ۲۰۲۵:- ایس -ایم- حسن
پٹنہ /سیتامڑھی، 08 اگست:مرکزی وزیر داخلہ امت شاہ نے جمعہ کو بہار کے سیتامڑھی ضلع کے پنورادھام میں واقع ماں سیتا کے عظیم الشان مندر کا سنگ بنیاد رکھا۔ سنگ بنیاد رکھنے سے پہلے، پنورادھام کے مہنت کوشل کشور داس جی کی قیادت میں بھومی پوجن کا انعقاد کیا گیا۔ ویدک منتروں کے جاپ کے ساتھ مکمل رسومات کے ساتھ پوجا مکمل ہوئی۔
بھومی پوجن کے لیے 21 تیرتھ کشیتروں سے مٹی اور کئی ندیوں کا پانی منگایا گیا تھا۔ اس کے علاوہ راجستھان کے جے پور سے چاندی کے کلش، دہلی میں چاندی سے بنے خصوصی پوجا کا سامان اور آندھرا پردیش کے مشہور تیرتھ مقام تروپتی بالاجی سے خصوصی لڈو بھی سیتامڑھی لائے گئے۔
ماں جانکی کے عالیشان مند رکی بھومی پوجن کی تقریب میں مرکزی وزیر داخلہ امت شاہ، وزیر اعلیٰ نتیش کمار، مرکزی وزیر للن سنگھ، مرکزی وزیر گری راج سنگھ، ریاستی بھارتیہ جنتا پارٹی (بی جے پی) کے صدر دلیپ جیسوال، نائب وزیر اعلیٰ سمراٹ چودھری، آبی وسائل کے وزیر وجے چودھری، دیہی ترقیات کے وزیر اشوک چودھری، جنتا دل یونائیٹڈ (جے ڈی یو) کے کارگزار صدر سنجے جھا سمیت ملک بھر سے تشریف لائے سادھو-سنت شامل ہوئے۔