تاثیر 13 اگست ۲۰۲۵:- ایس -ایم- حسن
کلکتہ، 13/ اگست (تاثیر بیورو) انڈین چیمبر آف کامرس میں ڈنمارک کے سفیر راسموس ایبلگارڈ کرسٹنسن کے ساتھ ایک اجلاس ہوا، جس میں قابلِ تجدید توانائی، پائیدار ترقی، تجارت اور ٹیکنالوجی میں تعاون کے امکانات پر بات چیت کی گئی۔
سفیر نے بتایا کہ ڈنمارک سمندری ہوا سے بجلی، توانائی کی بچت اور فضلہ ری سائیکلنگ میں عالمی رہنما ہے اور اس کی 50 فیصد سے زائد توانائی ہوا سے حاصل کی جاتی ہے۔ انہوں نے کہا کہ گرین ٹیکنالوجی میں ڈنمارک کی مہارت ہندوستان کے توانائی اہداف میں مددگار ہو سکتی ہے۔
اس وقت 200 سے زائد ڈنمارک کی کمپنیاں ہندوستان میں سرگرم ہیں، جن کی دلچسپی برقی گاڑیوں، پانی کے تحفظ اور طبی آلات میں بھی ہے۔ انہوں نے بتایا کہ ڈنمارک میں کئی پل ہندوستان میں انجینئر کیے جا رہے ہیں۔ کوپن ہیگن کو بھارتی سرمایہ کاروں کے لیے شمالی یورپی منڈی تک رسائی کا اہم گیٹ وے قرار دیا گیا۔