تاثیر 4 ستمبر ۲۰۲۵:- ایس -ایم- حسن
ہمیرپور، 4 ستمبر: اتر پردیش کے ہمیر پور ضلع کے کئی گاؤں میں کل رات ڈرون جیسی پراسرار چیز نظر آنے سے سنسنی پھیل گئی۔ بدھ کی رات 11 بجے، گاؤں والوں نے کئی بار آسمان پر چمکتی ہوئی روشنی اور اڑتی ہوئی چیز کو دیکھا۔ اس اچانک واقعہ نے گاؤں والوں میں خوف اور تجسس دونوں کا ماحول پیدا کر دیا۔ پولیس سرکل آفیسر صدر نے جمعرات کو بتایا کہ کئی دیہاتوں سے مشتبہ ڈرون دیکھنے کی اطلاع ملی ہے۔ پولیس نے سرچ آپریشن شروع کر دیا ہے اور اس بات کی تفتیش کی جا رہی ہے کہ یہ ڈرون کہاں سے اڑایا گیا اور اس کے پیچھے کس کا ہاتھ ہے۔
کرارا تھانہ علاقے کے راگھوا گاؤں کے رہنے والے جے پال، راج بھیا، راجندر پال، نتن اور جھلوکھر گاؤں کے روی سمیت پردھان کے نمائندے نیترام نے جمعرات کو ڈرون جیسی پرواز دیکھنے کا دعویٰ کیا۔ اسی طرح سمنودی، پچکھورا بزرگ، سیرولی بزرگ، بھورا، کسواہی اور سمر پور علاقے کے نوین گلہ منڈی کے دیہاتیوں نے بھی اس سرگرمی کی تصدیق کی۔ کئی لوگوں نے موبائل سے ویڈیوز بنا کر سوشل میڈیا پر شیئر کیں جس کی وجہ سے یہ معاملہ پورے علاقے میں موضوع بحث بن گیا۔