تاثیر 8 ستمبر ۲۰۲۵:- ایس -ایم- حسن
سہسرام ( انجم ) سہسرام نگر تھانہ علاقہ کے بولیا روڈ نورنگنج کے قریب دو فریقوں کے درمیان زبانی تکرار میں کچھ بدمعاشوں نے دھرم شالہ کے قریب ریڈی میڈ دکاندار منوج کمار کو گھر جاتے ہوئے پکڑ لیا اور اس کی پٹائی کر دی جس کی وجہ سے وہ شدید زخمی ہو گیا، اس کے سر پر بھی کچھ چوٹ آئی ہے، واقعہ اس وقت پیش آیا جب ایک ویڈیو وائرل ہوئی جس میں موٹر سائیکل پر جا رہا ایک شرارتی لڑکا قریبی مزار کے حوالے سے بکواس کرتا ہے جس کی وجہ سے دونوں فریقوں میں جھگڑا بھی ہوا، ایک فریق کے ایک شخص نے الزام لگایا کہ مذہب سے متعلق ویڈیو کیوں وائرل ہوئی جس کے بعد مذکورہ واقعہ نے اتوار کی رات 10 بجے فرقہ وارانہ رخ اختیار کر لیا ۔ مذکورہ معاملے کے سلسلے میں پولس نے دونوں فریقوں کے دس افراد کو حراست میں بھی لیا ہے، جن میں ویڈیو وائرل کرنے والا شخص اور ہنگامہ آرائی کرنے والے بھی شامل ہیں، جن سے پوچھ گچھ کی جارہی ہے، تاہم دیکھنا یہ ہے کہ پولس انتظامیہ اس معاملے کو کس سمت لے جاتی ہے ۔ مذکورہ معاملے میں کشیدگی کے بعد مذکورہ مقام پر ریپڈ ایکشن فورس بھی تعینات کردی گئی ہے ۔ موقع پر پہنچے ایس پی روشن کمار اور ایس ڈی او آشوتوش کمار نے بھی تمام لوگوں سے امن برقرار رکھنے کی اپیل کی ہے ۔ سب ڈویژنل پولس آفیسر سہسرام فاریسٹ دلیپ کمار نے بتایا کہ حالات کو قابو میں کر لیا گیا ہے ۔