تاثیر 15 ستمبر ۲۰۲۵:- ایس -ایم- حسن
شملہ، 15 ستمبر:ہماچل پردیش میں موسلادھار بارش کا قہر اب بھی جاری ہے۔ ضلع کانگڑا کے علاقے جوالی میں ایک اسپتال کے قریب پیر کی صبح مٹی کا تودہ گرا، جس میں ایک مہاجر خاندان ملبے تلے دب گیا۔ اس حادثے میں چار افراد زخمی ہو گئے۔ علاقے میں مسلسل بارش کی وجہ سے ندی اور نالے طغیانی پر ہیں اور کئی مقامات پر لینڈ سلائیڈنگ کے واقعات بھی ہو رہے ہیں۔
محکمہ موسمیات نے کانگڑا، اونا، ہمیر پور، بلاس پور اور منڈی اضلاع میں اورنج الرٹ جاری کیا ہے اور شملہ، سولن، کلو، چمبہ اور سرمور میں پیر کی دوپہر تک ایلو الرٹ جاری کیا ہے۔ 16 ستمبر کو کئی مقامات پر گرج چمک کے ساتھ بارش کے لیے ایلو الرٹ رہے گا۔ 17 سے 21 ستمبر تک ہلکی سے درمیانی بارش متوقع ہے، حالانکہ اس دوران کوئی الرٹ نہیں ہوگا۔ کل رات سے صبح تک سب سے زیادہ 56 ملی میٹر بارش منڈی ضلع کے جوگندر نگر میں ریکارڈ کی گئی۔ پالم پور میں 48 ملی میٹر، پانڈوہ میں 40 ملی میٹر اور کانگڑا میں 34 ملی میٹر بارش ہوئی۔