تاثیر 16 ستمبر ۲۰۲۵:- ایس -ایم- حسن
نئی دہلی، 16 ستمبر: دہلی کی وزیر اعلیٰ ریکھا گپتا نے منگل کو دارالحکومت کی ڈیفنس کالونی میں اپولو ہسپتال انٹرپرائز لمیٹڈ (اے ایچ ای ایل) کے تحت ایشیا کے پہلے خواتین کے کینسر ہسپتال ”اپولو ایتھینا” کا افتتاح کیا۔ اس موقع پر انہوں نے کہا کہ یہ سنٹر خواتین کو اعلیٰ معیاری علاج کی فراہمی میں ایک انقلابی قدم ہے جو خصوصی طور پر خواتین کے کینسر کے علاج کے لیے وقف ہے۔ انہوں نے کہا، ”اپولو ایتھینا خواتین کی صحت کی دیکھ بھال میں ایک بڑا قدم ہے۔ یہ ایشیا کی پہلی سرشار کینسر کے علاج کی سہولت ہے، جسے اپالو نے دہلی میں شروع کیا ہے۔ اس سے نہ صرف دہلی بلکہ پورے ملک اور دنیا بھر کی خواتین کو فائدہ پہنچے گا۔” انہوں نے کہا کہ دہلی حکومت پبلک پرائیویٹ پارٹنرشپ کے ذریعے صحت کے جدید اداروں کی تعمیر کو ترجیح دے رہی ہے۔ حکومت خواتین کی صحت پر سرگرمی سے کام کر رہی ہے اور مستقبل میں بھی کرتی رہے گی۔گپتا نے کہا کہ یہ سنٹر خاص طور پر خواتین کے لیے بنایا گیا ہے جہاں جدید ٹیکنالوجی اور ماہر ڈاکٹروں کی ٹیم کینسر کی علامات کی جلد پتہ لگانے سے لے کر مکمل علاج تک سہولیات فراہم کرے گی۔ انہوں نے کہا کہ اپولو ہسپتالوں کا یہ اقدام خواتین میں بریسٹ کینسر اور سروائیکل کینسر جیسی بیماریوں کے علاج میں اہم کردار ادا کرے گا۔