تاثیر 22 ستمبر ۲۰۲۵:- ایس -ایم- حسن
شملہ، 22ستمبر:ہماچل پردیش میں پیر کو بھی موسم صاف نظر آ رہا ہے اور دھوپ کھِلی ہوئی ہے۔ اس سے عوام کو راحت ملی ہے۔ محکمہ موسمیات کے مطابق ریاست سے مانسون کی واپسی کے لیے حالات سازگار ہیں اور اگلے 24 گھنٹوں میں مانسون ہماچل کے کئی علاقوں سے وداع ہو جائے گا۔ کل رات ریاست میں بعض مقامات پر ہلکی بارش ہوئی۔ سراہن میں 5 ملی میٹر، مراری دیوی میں 2 ملی میٹر اور دھولا کنواں میں 1 ملی میٹر بارش ریکارڈ کی گئی۔
محکمہ موسمیات نے آج اور کل ریاست بھر میں موسم صاف رہنے کی پیش گوئی کی ہے۔ 24 اور 25 ستمبر کو کانگڑا، شملہ اور سرمور اضلاع میں کچھ مقامات پر ہلکی بارش متوقع ہے، جبکہ دیگر اضلاع میں موسم صاف رہے گا۔ 26 سے 28 ستمبر تک پوری ریاست میں موسم صاف رہے گا۔