تاثیر 29 نومبر ۲۰۲۵:- ایس -ایم- حسن
کولکتہ، 29/ نومبر (تاثیر بیورو) ریڈی ایشن آنکو لوجسٹ آف انڈیا کی 45 ویں سالانہ کانفرنس اے آر او آئی کون 29 تا 30 نومبر بسوا بنگلہ کنونشن سینٹر میں کامیابی سے منعقد ہوئی۔ ایشیا کی بڑی آنکولوجی کانفرنسوں میں شامل اس تقریب میں 1800 سے زائد ماہرین نے بھارت سمیت برطانیہ، امریکہ، کینیڈا، یورپ اور آسیان ممالک سے شرکت کی۔
کانفرنس میں جدید سائنسی سیشنز، کلیدی خطابات، ورکشاپس اور مباحثے شامل تھے، خصوصاً پریسیژن ریڈیو تھراپی، پرسنلائزڈ میڈیسن اور مصنوعی ذہانت کے استعمال پر توجہ دی گئی۔ کینسر مریضوں کی سروائیور شپ، کوالٹی آف لائف اور پیلی ایٹو کیئر جیسے انسانی پہلو بھی اہم موضوع رہے۔
ڈاکٹر سمن ملک کے مطابق، کینسر کے نصف سے زائد مریضوں کو کسی نہ کسی مرحلے پر ریڈیو تھراپی کی ضرورت ہوتی ہے، لیکن معیاری علاج تک بروقت رسائی اب بھی ایک بڑا مسئلہ ہے۔ ڈاکٹر جیوترپ گوسوامی نے کہا کہ جدید آلات کے ساتھ تربیت یافتہ عملہ اور مضبوط ریفرل سسٹم بھی اتنے ہی ضروری ہیں، اور بھارت میں افرادی قوت و مشینری کی بہت سی کمی گزشتہ برسوں میں پوری ہو چکی ہے۔
کانفرنس کے دوران جدید ریڈیو تھراپی مشینوں اور تکنیکی اختراعات کی خصوصی نمائش بھی لگائی گئی، جس نے شرکاء کو مستقبل کی آنکولوجی کے نئے رجحانات سے روشناس کرایا۔