تاثیر 1 دسمبر ۲۰۲۵:- ایس -ایم- حسن
نئی دہلی، یکم دسمبر :دہلی کی وزیر اعلیٰ ریکھا گپتا نے پیر کو اندرا گاندھی انڈور اسٹیڈیم میں ملک کی پہلی انڈین پکل بال لیگ (آئی پی بی ایل) سیزن 1 کا آغاز کیا۔ انہوں نے اس موقع پر تمام ٹیموں اور کھلاڑیوں کے لیے نیک خواہشات کا اظہار کیا۔اس لیگ میں چھ ٹیمیں حصہ لیں گی جن میں حیدرآباد رائلز، بنگلورو بلاسٹرز، ممبئی سمیشرز، چنئی سپر واریئرز، لکھنؤ لیپرڈس اور کیپٹل واریئرس گڑگاؤں شامل ہیں۔وزیر اعلیٰ ریکھا گپتا نے سبھی شامل ہونے والوں کو مبارکباد دیتے ہوئے کہا کہ ہندوستان ہمیشہ کھیلوں سے محبت کرنے والا ملک رہا ہے، اور آج ہر ہندوستانی نئے کھیلوں کو تلاش کرنا چاہتا ہے۔ ہمارے کھیلوں کے ماحولیاتی نظام میں اب ایک نیا کھیل شامل ہو گیا ہے۔ انہوں نے مزید کہا کہ دہلی حکومت سب کو یقین دلاتی ہے کہ دہلی کے اسکولوں میں بھی پکل بال متعارف کرایا جائے گا، یہ ہمارے نوجوانوں کے لیے ایک اور کامیاب کھیل ہے۔گپتا نے کہا کہ اندرا گاندھی اسپورٹس کمپلیکس کے کے ڈی جادھو انڈور ہال میں یکم سے 7 دسمبر تک منعقد ہونے والا ہفتہ بھر کا پروگرام قومی اور بین الاقوامی سطح پر ہندوستان کی پہلی پیشہ ور پکل بال لیگ قائم کرے گا۔انہوں نے کہا کہ ٹائمز گروپ کے ذریعہ شروع کی جانے والی انڈین پکل بال لیگ ہندوستان کی سرکاری اور واحد قومی لیگ ہے۔ لیگ کو پکل بال ایسوسی ایشن کی طرف سے منظوری دی گئی ہے اور اسے وزارت کھیل اور نوجوانوں کے امور، حکومت ہند کے ذریعہ تسلیم کیا گیا ہے۔