تاثیر 15 دسمبر ۲۰۲۵:- ایس -ایم- حسن
نئی دہلی، 15 دسمبر: کچھ دنوں کی راحت کے بعد پیر کو دارالحکومت دہلی میں فضائی آلودگی ایک بار پھر انتہائی خطرناک سطح پر پہنچ گئی۔ دوپہر 12 بجے دہلی کے کئی علاقوں میں ہوا کے معیار کا انڈیکس 500 یا اس سے زیادہ ریکارڈ کیا گیا، جس کی وجہ سے دارالحکومت ایک بار پھر شدید آلودگی کی لپیٹ میں آ گیا۔بڑھتی ہوئی سردی اور ہوا کی رفتار کے کمزور ہونے کی وجہ سے آلودگی کے چھوٹے چھوٹے ذرات طویل عرصے تک فضا میں موجود رہتے ہیں۔ دھند کی ایک گھنی چادر صبح اور رات کو ڈھانپ رہی ہے۔ صبح 2:30 بجے حد نگاہ 100 میٹر کے قریب ریکارڈ کی گئی تھی لیکن صبح 6:30 تک یہ گھٹ کر 50 میٹر رہ گئی۔ سڑکوں پر گاڑیوں کی رفتار کم ہوگئی اور کئی مقامات پر ٹریفک بھی متاثر ہوئی۔ ماہرین موسمیات کے مطابق ہوا کی انتہائی کمزور رفتار کے باعث آلودہ ہوا منتشر نہیں ہو سکی۔ صبح کے وقت جنوب مغربی سمت سے 4 سے 6 کلومیٹر فی گھنٹہ کی رفتار سے ہوائیں چلیں جو آلودگی کو کم کرنے میں ناکام رہی۔