ممتا، حوصلے اور عزم کی درخشاں مثال: گود میں تین ماہ کا معصوم، امتحانی کمرے میں عالم فائنل کا پرچہ حل کرتی ہوئی حنا پروین

سیتامڑھی۔ (مظفر عالم)ڈمرا بلاک کے حسینہ گاؤں سے تعلق رکھنے والی محمد عیسیٰ کی صاحبزادی اور محمد خوشبدالدین کی اہلیہ حنا پروین نے علم دوستی، حوصلے اور ثابت قدمی کی ایسی مثال قائم کی ہے جو دیر تک یاد رکھی جائے گی۔ کسان کالج، بریارپور میں منعقد عالم و فاضل کے امتحان کے دوران، انہوں نے دوسری نشست میں اپنے تین ماہ کے شیر خوار بیٹے نور حافظ جان کو گود میں لیے ہوئے عالم فائنل ایئر کا امتحان دیا۔

امتحان مرکز میں یہ منظر دیکھتے ہی دیکھتے سب کی توجہ کا مرکز بن گیا۔ ایک جانب ماں کی بے پناہ ممتا تھی تو دوسری جانب تعلیم سے گہری وابستگی، خود اعتمادی اور فولادی عزم صاف جھلک رہا تھا۔ محدود وسائل، گھریلو ذمہ داریوں اور ماں بننے کے بعد کی مصروفیات کے باوجود امتحان میں شرکت کر کے حنا پروین نے یہ ثابت کر دیا کہ پختہ ارادہ اور سچی لگن کے سامنے کوئی رکاوٹ بڑی نہیں ہوتی۔

امتحان مرکز پر موجود دیگر امیدواروں، اساتذہ اور عملے نے حنا پروین کے اس غیر معمولی حوصلے کو دل کھول کر سراہا۔ لوگوں کا کہنا ہے کہ وہ نہ صرف خواتین بلکہ پورے معاشرے کے لیے ایک روشن مثال ہیں۔ ان کا یہ عمل واضح پیغام دیتا ہے کہ ماں بننا تعلیم کے سفر میں رکاوٹ نہیں، بلکہ انسان کو مزید مضبوط، باوقار اور پرعزم بنا دیتا ہے۔

حنا پروین آج  تعلیم کی اہمیت اور  عظیم وقار کی جیتی جاگتی تصویر بن کر پورے ضلع میں موضوعِ گفتگو ہیں، اور بے شمار نوجوانوں خصوصاً طالبات کے لیے حوصلہ و ترغیب کا سرچشمہ ثابت ہو رہی ہیں۔