تاثیر 25 دسمبر ۲۰۲۵:- ایس -ایم- حسن
نئی دہلی، 25 دسمبر: صدرجمہوریہ دروپدی مرمو نے جمعرات کو سنتھالی زبان میں دستور ہند کا باقاعدہ آغاز کیا۔ آئین سنتھالی زبان کے الچیکی رسم الخط میں شائع ہوا ہے۔
اس موقع پر راشٹرپتی بھون میں منعقدہ تقریب سے خطاب کرتے ہوئے صدر مرمو نے کہا کہ یہ سنتھالی برادری کے لیے فخر اور خوشی کی بات ہے کہ ہندوستان کا آئین اب ان کی اپنی زبان اور رسم الخط میں دستیاب ہے۔ اس سے سنتھالی بولنے والے لوگ آئین کو براہ راست پڑھنے اور سمجھنے کے قابل ہو جائیں گے۔ انہوں نے کہا کہ اپنی مادری زبان میں آئین کی روح اور اس کے آرٹیکلز کو سمجھنے کا موقع ملنے سے جمہوریت مزید مضبوط ہوتی ہے۔
صدر نے کہا کہ سال 2025 کو الچیکی رسم الخط کے صد سالہ سال کے طور پر منایا جا رہا ہے اور اتنے اہم سال میں الچیکی رسم الخط میں آئین کی اشاعت انتہائی قابل تحسین ہے۔ انہوں نے اس کامیابی کے لیے مرکزی وزیر قانون و انصاف اور ان کی ٹیم کی ستائش کی۔