سردی کی شدید لہر کے پیش نظر ضلع مجسٹریٹ کا بڑا فیصلہ

اسکولوں کے اوقات کار میں عارضی تبدیلی

مظفرپور، (نزہت جہاں)

ضلع میں مسلسل بڑھتی ہوئی کڑاکے کی سردی اور درجہ حرارت میں نمایاں کمی کے پیش نظر بچوں کی صحت اور جان و مال کے تحفظ کو مدنظر رکھتے ہوئے ضلع مجسٹریٹ نے اہم قدم اٹھایا ہے۔ سردی کی لہر سے پیدا ہونے والی ناموافق صورتِ حال کو دیکھتے ہوئے ضلع مجسٹریٹ سُبرت کمار سین نے “بھارتیہ سِول سیکیورٹی کوڈ 2023” کی دفعہ 163 کے تحت ایک اہم حکم نامہ جاری کیا ہے۔

جاری کردہ حکم کے مطابق مظفرپور ضلع کے تمام سرکاری و غیر سرکاری اسکولوں، پری اسکولوں اور آنگن باڑی مراکز میں تعلیمی سرگرمیوں کا انعقاد صبح 10:00 بجے سے پہلے اور دوپہر 3:30 بجے کے بعد ممنوع قرار دیا گیا ہے۔ یہ حکم 12 جنوری 2026 سے 17 جنوری 2026 تک نافذ العمل رہے گا۔

ضلع مجسٹریٹ نے واضح کیا ہے کہ اس مدت کے دوران تمام تعلیمی اداروں کے سربراہان اپنے اپنے مدارس میں تدریسی اوقات کی ازسرِنو ترتیب ضرور طے کریں تاکہ بچوں کو شدید سردی کے مضر اثرات سے محفوظ رکھا جا سکے۔ تاہم پری بورڈ اور بورڈ امتحانات کے سلسلے میں ہونے والی خصوصی کلاسیں اور امتحانات اس پابندی سے مستثنیٰ رہیں گے، تاکہ طلبہ کی تیاری متاثر نہ ہو۔

حکم نامے پر موثر عمل درآمد کے لیے ضلع مجسٹریٹ نے سب ڈویژنل آفیسر (مشرقی و مغربی)، تمام بلاک ڈویلپمنٹ آفیسرز، تھانہ انچارج اور ضلع ایجوکیشن آفیسر کو ہدایت دی ہے کہ اپنے اپنے علاقوں میں اس فیصلے پر سختی سے عمل کرائیں۔

ضلع مجسٹریٹ نے والدین، اسکول انتظامیہ اور عام شہریوں سے اپیل کی ہے کہ بچوں کی صحت کو اولین ترجیح دیتے ہوئے انتظامیہ سے بھرپور تعاون کریں۔ انہوں نے کہا کہ شدید سردی کے موسم میں بچوں کو گرم کپڑے پہنا کر ہی گھر سے باہر بھیجیں اور غیر ضروری طور پر کھلی جگہوں پر جانے سے گریز کریں۔ ضلع انتظامیہ بچوں کے تحفظ اور فلاح کے معاملے میں پوری طرح سنجیدہ اور پابند عہد ہے۔