تاثیر 17 جنوری ۲۰۲۶:- ایس -ایم- حسن
جموں، 17 جنوری (ہ س)۔ مرکز کے زیر انتظام خطے لداخ میں ہفتہ کے روز شدید سردی کی لہر برقرار رہی اور یہ خطہ جموں و کشمیر کا سرد ترین علاقہ بن کر ابھرا، جبکہ وادیٔ کشمیر میں بھی ہر طرف نقطۂ انجماد سے نیچے درجۂ حرارت درج کیا گیا۔ اس کے برعکس جموں خطے میں موسم نسبتاً معتدل رہا۔
محکمہ موسمیات کی جانب سے جاری اعداد و شمار کے مطابق لداخ کے علاقے دراس میں کم از کم درجۂ حرارت منفی 9.9 ڈگری سیلسیس ریکارڈ کیا گیا جو خطے میں سب سے کم رہا۔ دیگر علاقوں میں بھی سخت سردی دیکھی گئی، جہاں ہانلے میں منفی 8.0، لیہہ میں منفی 7.0، نیومہ میں منفی 5.6 اور کرگل میں منفی 5.1 ڈگری سیلسیس درج ہوا۔ سرد صحرائی خطے کے بیشتر حصے نقطۂ انجماد سے کافی نیچے رہے۔