تاثیر 19 جنوری ۲۰۲۶:- ایس -ایم- حسن
نئی دہلی، 19 جنوری :کانگریس پارٹی نے شنکراچاریہ ایوی مکتیشورانند سرسوتی کے موی اماوسیا پر نہانے کیلئے جاتے وقت مبینہ طور پر پولیس کے ذریعہ روکے جانے اور ان کے شاگردوں کی دھکا مکی کے واقعہ کو قابل مذمت قرار دیا ہے ۔
کانگریس کے ترجمان پون کھیڑا نے پیر کو یہاں پارٹی ہیڈکوارٹر میں ایک پریس کانفرنس میں اس واقعہ کی مذمت کی اور وزیر اعظم نریندر مودی سے مداخلت کی اپیل کی۔ انہوں نے کہا کہ پوری کانگریس پارٹی سنتوں کی حمایت میں کھڑی ہے۔ انہوں نے کہا کہ شنکراچاریہ سوامی ایوی مکتیشورانند کے ساتھ بدسلوکی سے ہر کوئی غمزدہ ہے۔ انہوں نے کہا کہ شنکراچاریہ اس واقعہ کے بعد سے بھوک ہڑتال پر ہیں، لیکن حکومت میں کسی کو پرواہ نہیں ہے۔ سنتوں کی توہین پر ہر کوئی غمزدہ ہے۔
انہوں نے الزام لگایا کہ بی جے پی حکومت میں ہر طرف افراتفری کا ماحول ہے۔ ماگھ میلے میں سنتوں کے لوگوں کے ساتھ شاہی غسل کرنے کی روایت بہت پرانی ہے۔ یہ روایت مغلوں اور انگریزوں سے پہلے سے چلی آ رہی ہے۔ آج تک کسی نے سنتوں کو شاہی اسنان کرنے سے نہیں روکا۔ اس حکومت کے تحت ایک طرف سنتوں کو نہانے سے روکا جاتا ہے تو دوسری طرف کمبھ میلہ جیسے بڑے پروگراموں میں امیروں کے لیے نہانے کے لیے وی آئی پی انتظامات کیے جاتے ہیں۔ یہ قابل مذمت ہے۔