تاثیر 1 فروری ۲۰۲۶:- ایس -ایم- حسن
ممبئی، 31 جنوری:مہاراشٹر کی سیاست میں ایک تاریخی لمحہ اس وقت رقم ہوا جب سنیترا پوار نے ہفتہ کے روز نائب وزیر اعلیٰ کے عہدے کا حلف اٹھایا اور وہ اس منصب پر فائز ہونے والی ریاست کی پہلی خاتون بن گئیں۔ ان کی حلف برداری راج بھون، ممبئی میں ایک مختصر تقریب کے دوران ہوئی، جہاں گورنر نے انہیں عہدے اور راز داری کا حلف دلایا۔ یہ پیش رفت ان کے شوہر اور این سی پی کے سرکردہ رہنما اجیت پوار کی وفات کے بعد سامنے آئی۔ تقریبِ حلف برداری میں وزیر اعلیٰ دیویندر فڑنویس، نائب وزیر اعلیٰ ایکناتھ شندے کے علاوہ بھارتیہ جنتا پارٹی اور نیشنلسٹ کانگریس پارٹی کے کئی سینئر رہنما شریک ہوئے۔ تقریب کے اختتام پر این سی پی کے قائدین نے اجیت پوار کے حق میں نعرے لگائے۔
اجیت پوار 28 جنوری 2026 کو برامتی کے نزدیک ایک فضائی حادثے میں جاں بحق ہو گئے تھے۔ اس سانحے کے بعد نیشنلسٹ کانگریس پارٹی نے متفقہ طور پر سنیترا پوار کو قانون ساز پارٹی کا لیڈر منتخب کیا۔ ان کے نام کی تجویز دلیپ والسے پاٹل نے پیش کی اور چھگن بھجبل نے اس کی تائید کی، جس کے بعد ان کی کابینہ میں شمولیت طے پا گئی۔ سنیترا پوار مہاراشٹر سے راجیہ سبھا کی رکن ہیں۔ ان کی پیدائش 18 اکتوبر 1963 کو مہاراشٹر کے عثمان آباد ضلع میں ہوئی۔ عوام میں‘‘دیدی’’کے نام سے معروف ہیں۔ ان کے دو بیٹے پرتھ پوار اور جے پوار ہیں۔ اجیت پوار کی موت کے بعد این سی پی کے اندر جاری سیاسی تبدیلیوں کے دوران ان کی حلف برداری کو قیادت کے تسلسل کے طور پر دیکھا جا رہا ہے۔