تاثیر 2 فروری ۲۰۲۶:- ایس -ایم- حسن
نئی دہلی، 2 فروری :چاندنی چوک سے ممبر پارلیمنٹ اور کنفیڈریشن آف آل انڈیا ٹریڈرز (سی اے آئی ٹی) کے قومی جنرل سکریٹری پروین کھنڈیلوال نے مرکزی بجٹ کو اعلیٰ امنگوں اور دور اندیشی والی ایک دستاویز قرار دیا ہے۔ مرکزی بجٹ کو ایم ایس ایم ای اور سودیشی پر مبنی عالمی مسابقت کا روڈ میپ بتاتے ہوئے، انہوں نے کہا کہ یہ بجٹ ملک کے گھریلو وسائل کے بہتر استعمال کے ذریعے اسے عالمی اقتصادی طاقت بنانے کے ہندوستان کے عزم کو مضبوط کرتا ہے۔
کھنڈیلوال نے پیر کو نئی دہلی میں ایک پریس کانفرنس سے خطاب کرتے ہوئے کہا کہ یہ پہلا موقع ہے جب مائیکرو، اسمال اور میڈیم انٹرپرائزز (ایم ایس ایم ای) سیکٹر کو بجٹ کے مرکز میں رکھا گیا ہے۔ انہوں نے مرکزی بجٹ کو 2047 کے ترقی یافتہ ہندوستان کے لئے ایک جرات مندانہ، ترقی پر مبنی اور کاروبار کے موافق روڈ میپ کے طور پر بیان کیا۔ انہوں نے کہا کہ اس بجٹ کا مقامی اور عالمی منڈیوں کے درمیان ہم آہنگی سے ہندوستانی مصنوعات کو اعتماد اور مسابقت کے ساتھ نئی بین الاقوامی منڈیوں تک پہنچنے میں مدد ملے گی۔ سی اے آئی ٹی کے جنرل سکریٹری نے 10,000 کروڑ کے ایم ایس ایم ای گروتھ فنڈ کے اعلان کا خیرمقدم کرتے ہوئے کہا کہ یہ ایم ایس ایم ای کو ملک کی طویل مدتی ترقی اور برآمدی منصوبوں میں ضم کرنے کے حکومت کے ارادے کی واضح عکاسی کرتا ہے۔