تاثیر 24 فروری ۲۰۲۶:- ایس -ایم- حسن
نئی دہلی، 24 فروری :اے آئی سمٹ میں یوتھ کانگریس کے کارکنوں کے نیم عریاں احتجاج کے بعد دہلی پولیس نے یوتھ کانگریس کے صدر ادے بھانو چِب کو گرفتار کر لیا ہے۔ کانگریس صدر ملکارجن کھڑگے اور لوک سبھا میں اپوزیشن لیڈر راہل گاندھی نے اس کارروائی پر اعتراض کیا ہے۔
کانگریس پارٹی کے آفیشل ایکس ہینڈل پر جاری ایک بیان میں کہا گیا ہے کہ گرفتاریاں غیر آئینی ہیں اور ہر شہری کو احتجاج کرنے کا حق ہے۔ پارٹی عوام کی آواز بلند کرتی رہے گی۔
نامہ نگاروں سے بات کرتے ہوئے کانگریس صدر ملکارجن کھڑگے نے کہا کہ ملک میں نوجوانوں کے لیے روزگار کی صورتحال تشویشناک ہے اور عوام میں عدم اطمینان بڑھ رہا ہے۔ امریکہ کے ساتھ معاہدے سے کسانوں اور ملک کے مفادات کو نقصان پہنچا ہے۔ یہ کارروائی اپوزیشن کی آواز کو دبانے کے لیے کی جا رہی ہے۔ کانگریس جمہوریت اور آئین کے تحفظ کے لیے لڑتی رہے گی۔ کانگریس ڈرنے والی نہیں ہے۔ میں اس کی مذمت کرتا ہوں۔