تاثیر 25 فروری ۲۰۲۶:- ایس -ایم- حسن
ممبئی ، 25 فروری : مالی سال 2026–27 کے لیے پیش کیے گئے بی ایم سی کے بجٹ نے ایک نیا ریکارڈ قائم کر دیا ہے جس کا مجموعی حجم 80,952.56 کروڑ روپے رکھا گیا ہے۔ میونسپل کمشنر بھوشن گگرانی نے بجٹ تجاویز اسٹینڈنگ کمیٹی کے چیئرمین پربھاکر شندے کو پیش کرتے ہوئے بتایا کہ اخراجات میں پچھلے سال کے مقابلے 6,500 کروڑ روپے سے زائد اضافہ کیا گیا ہے۔
یہ بجٹ ایک ایسے وقت میں سامنے آیا ہے جب شہری انتظامیہ نے بڑے منصوبوں کے ساتھ ساتھ وارڈ سطح پر ترقیاتی ضروریات کو بھی ترجیح دینے کا فیصلہ کیا ہے۔ اسٹینڈنگ کمیٹی کے دوبارہ فعال ہونے کے بعد اختیارات کی نچلی سطح تک منتقلی کو بجٹ کا اہم حصہ بنایا گیا ہے۔
شہری حکام نے بتایا کہ 31 جنوری 2026 تک ریاستی حکومت کے مختلف محکموں سے ملنے والی گرانٹس اور پراپرٹی ٹیکس کی مد میں 10,948.58 کروڑ روپے واجب الادا ہیں، جو مالیاتی دباؤ کی ایک بڑی وجہ بنے ہوئے ہیں۔
کیپٹل اخراجات کے طور پر 48,164.28 کروڑ روپے مختص کیے گئے ہیں جو اس بات کا ثبوت ہے کہ بی ایم سی طویل مدتی شہری ڈھانچے کی تعمیر کو اپنی اولین ترجیح بنا رہی ہے۔
سیوریج ڈسپوزل پروجیکٹ کے لیے 5,690 کروڑ روپے رکھے گئے ہیں تاکہ گندے پانی کے نظام کو جدید خطوط پر استوار کیا جا سکے۔ گوریگاؤں–ملنڈ لنک روڈ کو 2,650 کروڑ روپے دیے گئے ہیں جس سے ٹریفک کے مسئلے میں بڑی حد تک کمی متوقع ہے۔