تاثیر 13 اپریل ۲۰۲۶:- ایس -ایم- حسن
علی گڑھ، 13 اپریل : علی گڑھ مسلم یونیورسٹی کے کینیڈی آڈیٹوریم میں ”سیاست میں خواتین کی شرکت: منصفانہ نمائندگی کی جانب“ موضوع پر ایک سیمینار منعقد کیا گیا، جس میں ماہرین، اسکالرز اور طلبہ و طالبات نے شرکت کی اور صنفی مساوات، حکمرانی اور جمہوری شمولیت کے موضوعات پر بامعنی تبادلہ خیال کیا۔ مہمانِ خصوصی وائس چانسلر پروفیسر نعیمہ خاتون نے ”ناری شکتی وندن ایکٹ“ کو صنفی مساوات کی جانب ایک اہم پیش رفت قرار دیتے ہوئے کہا کہ فیصلہ سازی کے عمل میں خواتین کی شمولیت، چاہے بتدریج ہی کیوں نہ ہو، معاشرتی سطح پر بڑی تبدیلیاں لا سکتی ہے۔
انہوں نے کہا کہ حقیقی اختیار دہی ایسے سازگار ماحول کی فراہمی میں مضمر ہے جہاں خواتین اعتماد کے ساتھ قیادت کر سکیں، پالیسی سازی میں حصہ لے سکیں اور قومی ترقی کے عمل میں فعال کردار ادا کریں۔ انہوں نے اس بات پر زور دیا کہ جامع اور منصفانہ شرکت ایک انصاف پسند، ترقی پسند اور روشن خیال معاشرے کی بنیاد ہے۔ پرو وائس چانسلر پروفیسر محمد محسن خان نے اپنے خطاب میں کہا کہ خواتین کو بااختیار بنانے کے لیے صرف علامتی شمولیت کافی نہیں، بلکہ تعلیم، مالی خودمختاری اور مضبوط ادارہ جاتی نظام کی ضرورت ہے تاکہ خواتین مؤثر طور پر حکمرانی کے نظام میں حصہ لے سکیں۔