تاثیر 25 اپریل ۲۰۲۶:- ایس -ایم- حسن
نئی دہلی، 25 اپریل : مشرقی دہلی کے کلیان پوری تھانہ پولیس نے آپریشن ملاپ کے تحت لاپتہ ہونے والے دو نابالغ لڑکوں مہاراشٹر سے بحفاظت بازیاب کرکے ان کے اہل خانہ سے ملوایا ہے۔ یہ دونوں لڑکے کلاس 9 کے امتحان کے نتائج پر اپنے والدین کی طرف سے ڈانٹ ڈپٹ کے خوف سے گھر سے بھاگ گئے تھے۔ پولیس نے تکنیکی نگرانی، سوشل میڈیا ٹریکنگ اور 700 سے زیادہ سی سی ٹی وی فوٹیج کا جائزہ لینے کے بعد ان کا سراغ لگایا۔
مشرقی ضلع کے ڈپٹی کمشنر آف پولیس راجیو کمار نے ہفتہ کو بتایا کہ 30 مارچ کو پرمود ٹھاکر نے کلیان پوری پولیس اسٹیشن میں اپنے نابالغ بیٹے کی گمشدگی کی اطلاع دی۔ تقریبا ًاسی دوران بھاونا نامی خاتون نے اپنے بھائی کے اسی طرح لاپتہ ہونے کی اطلاع دی ۔ دونوں معاملوں میں ایف آئی آر نمبر 102/26 اور 103/26 کے تحت درج کر کے تحقیقات شروع کر دی گئی۔
ڈپٹی کمشنر آف پولیس کے مطابق، تحقیقات کے دوران، پولیس نے 700 سے زائد سی سی ٹی وی کیمروں سے فوٹیج کا جائزہ لیا، جس میں دونوں لڑکے اپنے گھر چھوڑ کر آنند وہار ریلوے اسٹیشن کی طرف جاتے ہوئے نظر آئے ۔ اس کے بعد، پولیس نے آنند وہار اور نظام الدین ٹرانزٹ ہب سے تقریباً 200 اضافی سی سی ٹی وی فوٹیج کی جانچ کی۔ تفتیش کے دوران، ایک لڑکے کی انسٹاگرام سرگرمی پولیس کے لیے اہم سراغ بن گئی۔ پولیس نے پایا کہ وہ انسٹاگرام تک رسائی کے لیے اپنے سفر کے دوران مختلف موبائل ہاٹ اسپاٹ کااستعمال کر رہا تھا۔ بعد میں، جب اس نے ایک نئی انسٹاگرام آئی ڈی کے ساتھ لاگ ان کیا، تو پولیس نے تکنیکی تجزیہ کے ذریعے استعمال ہونے والے موبائل نمبر کا پتہ لگایا، جس سے پتہ چلا کہ مقام مہاراشٹر میں ہے۔