کولکاتا، 29 اپریل : مغربی بنگال اسمبلی انتخابات کے پہلے مرحلے میں ریکارڈ ووٹنگ کے بعد دوسرے اور آخری مرحلے میں بھی معمولی تشدد اور کشیدگی کے درمیان زبردست ووٹنگ دیکھنے میں آئی۔ شام 5 بجے تک دارالحکومت کولکاتا سمیت جنوبی بنگال کے سات اضلاع کی 142 سیٹوں کے لیے 89.99 فیصد ووٹنگ ریکارڈ کی گئی۔
الیکشن کمیشن کی طرف سے جاری کردہ اعداد و شمار کے مطابق شام 5 بجے تک سب سے زیادہ 92.46 ووٹنگ فیصد مشرقی بردھمان میں ریکارڈ کی گئی جبکہ سب سے کم ووٹنگ فیصد 86.11 کلکتہ جنوبی میں ریکارڈ کی گئی۔ اس کے علاوہ ہوگلی ضلع میں 90.34 فیصد ، ہاوڑہ میں 89.44 فیصد ، کولکاتا شمالی میں 87.77 فیصد ووٹنگ ریکارڈ کی گئی۔ دوسری طرف نادیہ ضلع میں 90.27 فیصد ، شمالی 24 پرگنہ میں 89.74 فیصد اور جنوبی 24 پرگنہ میں 89.57 فیصد ووٹنگ ریکارڈ کی گئی۔
دوسرے اور آخری مرحلے میں کل 1,448 امیدواروں کے سیاسی مستقبل کو ای وی ایم میں قید کیا گیا۔ اس مرحلے میں کئی قدآور امیدوار مقابلہ کر رہے ہیں۔ بھوانی پور سیٹ پر وزیر اعلیٰ ممتا بنرجی اور اپوزیشن لیڈرشبھیندھو ادھیکاری آمنے سامنے ہیں۔ ان کے علاوہ ممتا حکومت کے کئی وزراءبشمول ریاستی وزراءفرہاد حکیم، اروپ بسواس ، جاوید خان ، سوجیت باسو، ششی پنجہ ، بنگال کانگریس کے صدر سبھانکر سرکار ، فائر برانڈ سی پی آئی (ایم) لیڈر میناکشی مکھرجی اور دپسیتا دھر بھی شامل ہیں۔ آر جی کر ہسپتال میں عصمت دری اور قتل کرنے والے ڈاکٹر کی ماں رتنا دیبناتھ اور سندیشکھلی تحریک کا چہرہ ریکھا پاترا بھی بھارتیہ جنتا پارٹی (بی جے پی) کے امیدوار ہیں۔
جنوبی بنگال کے سات اضلاع کولکاتا ، ہاوڑہ ، شمالی 24 پرگنہ ، جنوبی 24 پرگنہ ، ہگلی ، نادیہ اور مشرقی بردھمان کی 142 سیٹوں پر سخت حفاظتی انتظامات کیے گئے تھے۔ ریاستی پولیس اور مرکزی فورسز کے ساتھ ساتھ نیشنل انویسٹی گیشن ایجنسی (این آئی اے) نے بھی دن بھر پولنگ کے عمل پر نظر رکھی۔ پولنگ والے علاقوں میں مرکزی فورسز کی 2,231 کمپنیاں، یعنی دو لاکھ سے زیادہ جوانوں کو تعینات کیا گیا تھا۔ مرکزی فورسز کی سب سے زیادہ 274 کمپنیاں دارالحکومت کولکتہ میں تعینات کی گئیں۔ وہیں پربا بردھمان ضلع میں 263 کمپنیاں اور 236 کمپنیاں ہوگلی (دیہی) علاقے میں تعینات کی گئیں۔ اس کے ساتھ تقریباً 40 ہزار پولیس اہلکار الیکشن ڈیوٹی پر تعینات تھے۔