بھرہلی میں نوجوان کی مشتبہ موت، زہریلی شراب سے ہلاکت کی افواہوں کی اہلِ خانہ نے تردید کی

سنگھواڑہ دربھنگہ ( محمد مصطفیٰ) سنگھواڑہ تھانہ حلقہ کے بھرہلی وارڈ نمبر ایک میں ہفتہ کے روز 26 سالہ ایک نوجوان کی مشتبہ حالات میں موت ہو گئی۔ واقعہ کے بعد علاقے میں زہریلی شراب پینے سے موت ہونے کی چہ مگوئیاں پھیل گئیں، لیکن اہلِ خانہ نے اس دعوے کو مسترد کرتے ہوئے کہا کہ موت بیماری کے سبب ہوئی ہے

متوفی کی شناخت آنجہانی راجندر منڈل کے 26 سالہ بیٹے دھیانی منڈل کے طور پر ہوئی ہے۔ مقامی لوگوں اور بعض عوامی نمائندوں کا الزام تھا کہ نوجوان کی موت زہریلی شراب پینے کے باعث ہوئی ہے۔ اطلاع ملنے پر پولیس اور محکمہ انسداد شراب بندی کے افسران موقع پر پہنچے اور معاملے کی جانچ شروع کی جانچ کے دوران متوفی کی والدہ سکماری دیوی، ممانی گیتا دیوی اور دیگر اہلِ خانہ نے حکام کو بتایا کہ جمعہ کی رات سے دھیانی منڈل کے پیٹ میں شدید درد کی شکایت تھی۔ علاج کی کوششیں کی گئیں، لیکن ہفتہ کی صبح اس کا انتقال ہو گیا موقع پر صدر ایس ڈی پی او ٹو کمتول ایس کے سمن، محکمہ انسداد شراب بندی کے ڈی ایس پی اجے کمار اور سنگھواڑہ تھانہ انچارج بسنت کمار، داروغہ کملیش مشرا ، دلیپ سنگھ موجود تھے۔ ان کے سامنے مکھیا نمائندہ دنیش یادو اور سرپنچ نمائندہ للت یادو بھی موجود رہے۔ اہلِ خانہ نے واضح طور پر بتایا کہ نوجوان کی موت بیماری کے باعث ہوئی ہے ایس ڈی پی او ایس کے سمن نے بتایا کہ ابتدائی جانچ میں یہ بات سامنے آئی ہے کہ طبیعت بگڑنے پر نوجوان کو جھاڑ پھونک کے لیے بھی لے جایا گیا تھا۔ اسی دوران علاج کے سلسلے میں اس کی موت ہو گئی۔ انہوں نے بتایا کہ اہلِ خانہ نے لاش کا پوسٹ مارٹم کرانے سے بھی انکار کر دیا ہے فی الحال پولیس معاملے کی جانچ کر رہی ہے اور موت کی وجوہات کے تمام پہلوؤں سے معلومات حاصل کی جا رہی ہیں