ہوڑہ ضلع میں مردم شماری کی تیاریوں کے سلسلے میں تین روزہ تربیتی پروگرام کامیابی سے منعقد

ہوڑہ، 25/ جون (تاثیر بیورو) آئندہ مردم شماری کے پیش نظر ہوڑہ ضلع انتظامیہ کی جانب سے چارج آفیسرز، ایڈیشنل چارج آفیسرز اور تکنیکی افسران کے لیے تین روزہ خصوصی تربیتی پروگرام کا کامیاب انعقاد کیا گیا۔ یہ پروگرام 22 جون سے 24 جون 2026 تک نیو کلکٹریٹ بلڈنگ، ہوڑہ کے پتھر دابی میٹنگ ہال میں منعقد ہوا۔

تربیتی پروگرام میں پرنسپل مردم شماری افسر و ضلع مجسٹریٹ ہوڑہ، ضلع مردم شماری افسر و ایڈیشنل ضلع مجسٹریٹ (پنچایت)، ایڈیشنل ضلع مردم شماری افسر و ڈی پی اینڈ آر ڈی او سمیت ضلع انتظامیہ اور ڈائریکٹوریٹ آف سینسس آپریشنز، مغربی بنگال کے ماسٹر ٹرینرز نے شرکت کی۔

تین روزہ تربیت کا مقصد مردم شماری سے وابستہ افسران و اہلکاروں کی معلومات، مہارت اور عملی تیاری کو مزید مؤثر بنانا تھا۔ اس دوران مردم شماری کے طریقۂ کار، اعداد و شمار کے حصول، ڈیجیٹل پلیٹ فارمز کے استعمال، نگرانی کی ذمہ داریوں اور فیلڈ سطح پر رابطہ کاری سے متعلق مختلف موضوعات پر تفصیلی سیشن منعقد کیے گئے۔

شرکاء نے تربیتی نشستوں، عملی مظاہروں اور تبادلۂ خیال کے پروگراموں میں بھرپور حصہ لیا، جس سے ان کی پیشہ ورانہ صلاحیتوں میں اضافہ ہوا اور مردم شماری کی ذمہ داریوں کو مؤثر انداز میں انجام دینے کے لیے ان کی تیاری مزید مضبوط ہوئی۔

پروگرام کے اختتام پر مردم شماری سے متعلق اہم رہنما اصولوں اور عملی حکمت عملیوں کا جائزہ لیا گیا تاکہ ضلع بھر میں مردم شماری کے تمام مراحل کو منظم، شفاف اور کامیاب انداز میں انجام دیا جا سکے۔