تاثیر 6 جولائی ۲۰۲۶:- ایس -ایم- حسن
جموں، 06 جولائی :جموں و کشمیر کے ضلع کشتواڑ میں پیر کے روز شدید بارش کے باعث زیرِ تعمیر 540 میگاواٹ کوار ہائیڈرو الیکٹرک پاور پروجیکٹ کے قریب بڑے پیمانے پر لینڈ سلائیڈنگ ہوئی، جس کے نتیجے میں کئی گاڑیاں، ٹرک، ٹینکر اور بھاری مشینری مٹی، پتھروں اور ملبے تلے دب گئی جبکہ پروجیکٹ کے علاقے میں بڑے پیمانے پر نقصان پہنچا۔
ذرائع کے مطابق دریائے چناب پر کشتواڑ شہر سے تقریباً 28 کلومیٹر دور واقع کوار ہائیڈرو الیکٹرک پروجیکٹ کو چناب ویلی پاور پروجیکٹس لمیٹڈ (سی وی پی پی ایل) تعمیر کر رہی ہے۔ عینی شاہدین نے بتایا کہ مسلسل بارش کے بعد اچانک لینڈ سلائیڈنگ ہوئی، جس سے بھاری مقدار میں مٹی اور پتھر سڑک پر آ گرے اور پروجیکٹ تک جانے والا راستہ بند ہو گیا۔ کئی ٹرک، ٹینکر اور دیگر بھاری گاڑیاں ملبے تلے دب گئیں جبکہ سڑک کا بڑا حصہ بھی متاثر ہوا۔
رپورٹس کے مطابق مٹی کے تودے گرنے سے سڑک کنارے موجود بنیادی ڈھانچے کو بھی نقصان پہنچا اور متعدد مشینری جزوی طور پر ملبے میں دب گئی۔ واقعے کے فوراً بعد انتظامیہ اور پروجیکٹ حکام نے بھاری مشینری کی مدد سے ملبہ ہٹانے اور راستہ بحال کرنے کا کام شروع کر دیا۔ دب جانے والی گاڑیوں اور مشینری کو نکالنے کی کوششیں جاری ہیں۔