تاثیر 17 جولائی ۲۰۲۶:- ایس -ایم- حسن
موتیہاری17جولائی(خالد سیف اللہ):
موتیہاری شہر کے مصروف ترین چھتونی چوک پر زیر تعمیر نیشنل ہائی وے اوور برج کی سست رفتار تعمیر پر ضلع انتظامیہ نے سخت موقف اختیار کیا ہے۔ عوامی شکایات اور مسلسل ٹریفک جام کے پیش نظر ضلع مجسٹریٹ سوربھ سمن یادو نے اعلیٰ حکام کے ساتھ تعمیراتی مقام کا اچانک معائنہ کیا اور کام کی رفتار پر ناراضگی ظاہر کرتے ہوئے متعلقہ ایجنسی کو فوری بہتری کی ہدایت دی۔
معائنہ کے دوران پولیس سپرنٹنڈنٹ سورن پربھات، میونسپل کمشنر آشیش کمار، صدر سب ڈویژنل افسر ارون کمار، صدر ڈی ایس پی دلیپ کمار اور این ایچ اے آئی کے متعلقہ افسران بھی موجود تھے۔ ضلع مجسٹریٹ نے تعمیراتی کام کا جائزہ لیتے ہوئے کہا کہ عوامی سہولت کو اولین ترجیح دی جائے اور اوور برج کی تعمیر مقررہ معیار اور وقت کے مطابق مکمل کی جائے۔ انہوں نے واضح کیا کہ غیر ضروری تاخیر یا لاپروائی کسی صورت برداشت نہیں کی جائے گی۔
ڈی ایم نے متعلقہ تعمیراتی ایجنسی کو ہدایت دی کہ افرادی قوت اور مشینری میں اضافہ کر کے کام کی رفتار تیز کی جائے تاکہ شہریوں کو روزانہ درپیش مشکلات سے جلد نجات مل سکے۔ انہوں نے زیر تعمیر مقام پر حفاظتی انتظامات مزید مضبوط بنانے اور تعمیراتی معیار پر خصوصی توجہ دینے کی بھی تاکید کی۔
معائنہ کے دوران ٹریفک کی روانی برقرار رکھنے کے لیے چھتونی چوک اور اطراف میں غیر منظم پارکنگ کے خلاف مؤثر کارروائی کرنے کی ہدایت دی گئی۔ اس کے علاوہ سروس روڈ کو جلد قابلِ استعمال بنانے، سڑکوں کے گڑھوں کی فوری مرمت اور بارش کے دوران پانی جمع ہونے کے مسئلے کے حل کے لیے بھی متعلقہ حکام کو ضروری احکامات جاری کیے گئے۔
ضلع انتظامیہ کی اس کارروائی کے بعد مقامی شہریوں اور تاجروں نے امید ظاہر کی ہے کہ اوور برج کی تعمیر میں تیزی آئے گی اور شہر کو طویل عرصے سے درپیش ٹریفک جام اور آمد و رفت کی مشکلات میں خاطر خواہ کمی ہوگی۔