تاثیر 25 جولائی ۲۰۲۶:- ایس -ایم- حسن
فتح پور، 25 جولائی :اتر پردیش کے وزیر اعلیٰ یوگی آدتیہ ناتھ نے ہفتہ کے روز کہا کہ نقل مافیا سماجوادی پارٹی اور کانگریس کی پیداوار ہیں اور ایسے عناصر کی جگہ ’جیل یا جہنم‘ ہے۔ انہوں نے کہا کہ نقل مافیا کو کسی صورت نہیں بخشا جائے گا اور نوجوانوں کے مستقبل سے کھیلنے والوں کے خلاف سخت کارروائی کی جائے گی۔ انہوں نے اس سلسلے میں وزیر اعظم نریندر مودی کی جانب سے کیے گئے فیصلوں کا خیر مقدم کرتے ہوئے ان کا شکریہ بھی ادا کیا۔
فتح پور میں 489 کروڑ روپے سے زائد مالیت کی 125 ترقیاتی منصوبوں کے افتتاح اور سنگ بنیاد رکھنے کے موقع پر یوگی آدتیہ ناتھ نے کہا کہ 2017 سے پہلے فتح پور ریاست کے سب سے پسماندہ اضلاع میں شمار ہوتا تھا۔ تعلیم، صحت، زراعت، صنعت اور بنیادی ڈھانچے کے شعبوں میں ضلع ترقی سے محروم تھا اور یہاں کے ترقیاتی فنڈز کا غلط استعمال کیا جاتا تھا۔وزیر اعلیٰ نے الزام لگایا کہ سابق حکومتوں کے دور میں ’سیفئی سنڈیکیٹ‘ نے ترقیاتی منصوبوں کے لیے مختص رقم میں لوٹ مچائی اور فتح پور کو نظر انداز کیا۔ ان کے مطابق اس وقت ضلع میں نہ مناسب سڑکیں تھیں، نہ بجلی، نہ میڈیکل کالج اور نہ ہی صنعتی سرمایہ کاری کا سازگار ماحول موجود تھا۔
انہوں نے کہا کہ ماضی میں نوجوانوں کو ملازمتوں کے لیے رشوت اور سفارش کا سامنا کرنا پڑتا تھا اور 2012 سے 2017 کے درمیان ہونے والی بیشتر سرکاری بھرتیاں تنازعات کا شکار رہیں۔ ان کا دعویٰ تھا کہ 2017 کے بعد ریاستی حکومت نے شفاف نظام کے ذریعے گزشتہ نو برسوں میں نو لاکھ سے زائد سرکاری ملازمتیں فراہم کیں، جن میں فتح پور کے نوجوان بھی شامل ہیں۔یوگی آدتیہ ناتھ نے کہا کہ آج فتح پور میں سڑکیں، بجلی، کمپوزٹ اسکول، اسپتال، میڈیکل کالج اور دیگر بنیادی سہولیات تیزی سے ترقی کر رہی ہیں۔ ان کے مطابق موجودہ حکومت ’سب کا ساتھ، سب کا وکاس‘ کے اصول پر کام کر رہی ہے۔