آپریشن ودھی پالک” کے تحت اندروا ہائی اسکول میں بیداری مہم

طلبہ کو خواتین کے احترام اور تحفظ کا پیغام

سیتامڑھی (مظفر عالم)سونبرسا بلاک میں خواتین اور بچیوں کے تحفظ، عزت و احترام اور صنفی مساوات کے بارے میں عوامی بیداری پیدا کرنے کے مقصد سے “آپریشن ودھی پالک” کے تحت بدھ کے روز سونبرسا تھانہ پولیس کی جانب سے اندروا ہائی اسکول میں ایک بیداری مہم چلائی گئی۔ اس مہم کے دوران طلبہ و طالبات، خصوصاً لڑکوں کو خواتین اور بچیوں کے ساتھ باوقار اور مہذب رویہ اختیار کرنے، خواتین کے تحفظ، ان کے خلاف ہونے والے جرائم، متعلقہ قانونی و تعزیری دفعات اور ہنگامی حالات میں پولیس سے مدد حاصل کرنے کے طریقوں کے بارے میں تفصیلی معلومات فراہم کی گئی۔ پولیس افسران نے طلبہ کو قانون کی پابندی کرنے، ذمہ دار شہری بننے اور خواتین کے احترام و تحفظ کو اپنی سماجی ذمہ داری سمجھنے کی تلقین کی۔ ساتھ ہی انہیں یہ پیغام بھی دیا گیا کہ وہ اس بیداری کو اپنے گھر، خاندان اور معاشرے تک پہنچائیں تاکہ خواتین اور بچیوں کے لیے ایک محفوظ اور باوقار ماحول قائم کیا جا سکے۔

مہم کے اختتام پر پولیس نے عوام سے اپیل کی کہ کسی بھی مجرمانہ واقعہ یا مشتبہ سرگرمی کی اطلاع فوری طور پر ڈائل 112 یا قریبی تھانے کو دیں، تاکہ بروقت کارروائی یقینی بنائی جا سکے۔