تاثیر 17 اگست ۲۰۲۶:- ایس -ایم- حسن
کولکاتا، 17 اگست: پاکستانی شہری رانا رؤف عرف وہاب عالم کو نیپال کے دارالحکومت کاٹھمنڈو سے مغربی بنگال کے کولکاتا لانے اور اس کے لیے بھارتی شناخت کے جعلی دستاویزات تیار کرانے کے الزام میں بنگال پولیس کی اسپیشل ٹاسک فورس (ایس ٹی ایف) نے ایک اور نوجوان کو گرفتار کیا ہے۔ گرفتار نوجوان کی شناخت عمران حسین کے طور پر ہوئی ہے۔ وہ تاپسیا کا رہنے والا ہے۔
ایس ٹی ایف نے یوم آزادی سے قبل 12 اگست کو شمالی 24 پرگنہ ضلع کے ہابڑا سے رانا رؤف کو گرفتار کیا تھا۔ تحقیقات میں سامنے آیا کہ رؤف جعلی شناخت کی بنیاد پر کولکاتا میں رہ رہا تھا۔ وہ نیپال کے راستے ہندوستان آیا تھا۔ تحقیقاتی ایجنسیوں کو اس کے پاکستانی خفیہ ایجنسی آئی ایس آئی سے تعلقات کا بھی پتہ چلا ہے۔
ابتدائی تحقیقات کے مطابق رانا کو ہندوستان میں ایک خفیہ نیٹ ورک تیار کرنے کی ذمہ داری دی گئی تھی۔ وہ حساس اور خفیہ معلومات جمع کرنے کے لیے لوگوں کو اپنے ساتھ جوڑنے کی کوشش کر رہا تھا۔ تحقیقات میں یہ بھی سامنے آیا کہ اس نے بنگلہ دیش کے راستے فرار ہونے کا منصوبہ بنایا تھا۔
رانا کی مدد کرنے کے الزام میں تاپسیا کے رہنے والے اعجاز علی کو پہلے ہی گرفتار کیا جا چکا ہے۔ ایس ٹی ایف کے مطابق اعجاز رانا کے ساتھی کے طور پر کام کر رہا تھا۔ اب تحقیقات کے دوران عمران حسین کا کردار بھی سامنے آیا ہے۔