ڈی ایس پی ششی بھوشن سنگھ نے سمری تھانے کا معائنہ کیا، انتظامات میں بہتری کے لیے دی ہدایات

 سنگھواڑہ دربھنگہ (محمد مصطفیٰ)لائن ڈی ایس پی ششی بھوشن سنگھ نے ہفتہ کے روز اپنے گود لیے گئے سمری تھانے کا معائنہ کیا۔ تھانے پہنچنے پر انہوں نے پولیس افسران اور اہلکاروں سے تھانے کی کارکردگی اور علاقے کی امن و قانون کی صورتحال کے بارے میں معلومات حاصل کی

معائنے کے دوران ڈی ایس پی نے تھانے کے مختلف ریکارڈ، زیر التوا مقدمات، تفتیش کی پیش رفت، وارنٹ اور گرفتاری کی صورتحال سمیت دیگر پولیس امور کا جائزہ لیا۔ انہوں نے زیر التوا مقدمات کو جلد نمٹانے اور سنگین معاملات میں فوری کارروائی یقینی بنانے کی ہدایت دی ڈی ایس پی نے علاقے میں باقاعدگی سے گشت بڑھانے، مشتبہ سرگرمیوں پر نظر رکھنے اور جرائم پر قابو پانے کے لیے فعال انداز میں کام کرنے کو کہا۔ انہوں نے کہا کہ تھانہ علاقے میں امن و قانون برقرار رکھنا پولیس کی اولین ذمہ داری ہے۔ عام لوگوں کی شکایات کو سنجیدگی سے سنتے ہوئے ضابطے کے مطابق فوری حل کیا جائے۔ انہوں نے مفرور ملزمان کی گرفتاری اور وارنٹ کی تعمیل میں تیزی لانے کی بھی ہدایت دی۔ اس کے ساتھ ہی تھانے کی صفائی، ریکارڈ کے رکھ رکھاؤ اور پولیس اہلکاروں کی کارکردگی کا بھی جائزہ لیا۔ ڈی ایس پی نے پولیس اور عوام کے درمیان بہتر تال میل قائم کرنے پر زور دیتے ہوئے کہا کہ لوگوں میں پولیس کے تئیں اعتماد برقرار رکھنے کے لیے حساسیت اور مستعدی کے ساتھ کام کرنا ضروری ہے۔

موقع پر سمری تھانہ انچارج اروند کمار، سب انسپکٹر پنّالال سنگھ، لال کرشن یادو، پی ٹی سی ستیش کمار سمیت دیگر پولیس افسران اور اہلکار موجود تھے