تاثیر 31 اگست ۲۰۲۶:- ایس -ایم- حسن
چنئی، 31 اگست : تمل ناڈو کے سابق وزیر تھوپّو وینکٹاچلم نے دراوڑ منیتر کڈگم (ڈی ایم کے) سے استعفیٰ دینے کا اعلان کیا ہے۔ انہوں نے اس سلسلے میں ڈی ایم کے صدر ایم کے اسٹالن کو اپنا استعفیٰ بھیج دیا ہے۔ وینکٹاچلم نے پیر کو صحافیوں سے گفتگو کے دوران اپنے فیصلے کی اطلاع دی۔تھوپّو وینکٹاچلم نے آج صبح ایروڈ کے پیروندورئی میں منعقدہ پریس کانفرنس میں کہا کہ انہوں نے ڈی ایم کے کی بنیادی رکنیت سمیت پارٹی میں اپنی تمام ذمہ داریوں سے خود کو مکمل طور پر الگ کر لیا ہے۔ انہوں نے بتایا کہ اپنا استعفیٰ پارٹی صدر ایم کے اسٹالن کو بھیج دیا ہے۔صحافیوں کے سوالات کا جواب دیتے ہوئے وینکٹاچلم نے واضح کیا کہ فی الحال انہوں نے کسی دوسری سیاسی جماعت میں شامل ہونے کے بارے میں کوئی فیصلہ نہیں کیا ہے۔ ان کے بقول، ’’فی الحال میں صرف ڈی ایم کے سے الگ ہوا ہوں۔‘‘
پارٹی صدر کو بھیجے گئے اپنے خط میں وینکٹاچلم نے کہا کہ تمل ناڈو میں اسمبلی انتخابات قریب آنے کے ساتھ ہی مختلف سیاسی جماعتوں میں اندرونی اختلافات اور عہدیداروں میں تبدیلیوں کا سلسلہ تیز ہو گیا ہے۔سیاسی حلقوں میں یہ قیاس آرائی کی جا رہی ہے کہ گزشتہ کچھ عرصے سے پارٹی کی اعلیٰ قیادت کے ساتھ پیدا ہونے والے اختلافات اور ضلعی انچارج کے عہدے میں تبدیلی کے بعد وینکٹاچلم نے یہ اہم فیصلہ کیا ہے۔ کونگو خطے کی سیاست میں اہم کردار ادا کرنے والے سابق وزیر کے ڈی ایم کے سے استعفیٰ دینے کے بعد ریاست کی سیاسی سرگرمیوں میں ہلچل پیدا ہو گئی ہے۔