تاثیر 31 اگست ۲۰۲۶:- ایس -ایم- حسن
ممبئی، 31 اگست: میگھنا گلزار کی ہدایت کاری میں بننے والی کرائم تھرلر فلم ’دائرہ‘ کا باضابطہ ٹریلر جاری کر دیا گیا ہے۔ فلم میں کرینہ کپور اور پرتھوی راج سُکُمارن مرکزی کرداروں میں نظر آئیں گے۔ جنگلی پکچرز اور پین اسٹوڈیوز کے بینر تلے بننے والی یہ سنجیدہ نوعیت کی تفتیشی کرائم تھرلر حقیقی واقعات سے متاثر ہے۔ فلم میں سنگین جرم کے بعد معاشرے میں پیدا ہونے والی تقسیم اور نظامِ انصاف کو درپیش چیلنجز کو مرکزی موضوع بنایا گیا ہے۔
ٹریلر کا آغاز کرینہ کپور کے کردار ڈی سی پی اجونی کوہلی اور پرتھوی راج سُکُمارن کے کردار ڈی سی پی رمن کمار سے ہوتا ہے۔ اجونی ایک پُرسکون، سنجیدہ اور قوانین کے دائرے میں رہ کر کام کرنے والی پولیس افسر ہیں، جبکہ رمن ایک جارحانہ اور نتائج پر زیادہ توجہ دینے والے افسر کے طور پر دکھائی دیتے ہیں۔کہانی اس وقت نیا رخ اختیار کرتی ہے جب ایک متنازع پولیس انکاؤنٹر کے معاملے پر دونوں افسران کے درمیان اختلافات پیدا ہو جاتے ہیں۔ اس کے بعد دونوں کے درمیان شدید بحث، طنزیہ جملوں اور ذہنی چالوں کے ذریعے کشیدگی بڑھتی ہوئی نظر آتی ہے۔