تاثیر 15 ستمبر ۲۰۲۶:- ایس -ایم- حسن
جموں، 15 ستمبر: نیشنل ہیلتھ مشن (این ایچ ایم) ملازمین کی جاری ہڑتال و احتجاج آج ساتویں روز بھی جموں و کشمیر کے مختلف اضلاع میں جاری رہا۔ یو ٹی سطح کی رابطہ کمیٹی کے بینر تلے جموں صوبے کے ضلعی و بلاک صدر مقامات پر ملازمین نے احتجاج کرتے ہوئے اپنے دیرینہ مطالبات کے حق میں آواز بلند کی۔ احتجاج کی قیادت جے کے این ایچ ایم ای اے جموں صوبہ کے صدر ڈاکٹر وکاس شرما نے کی۔ اس دوران ڈاکٹروں، نیم طبی عملے، انتظامی ملازمین اور این ایچ ایم کی مختلف اسکیموں سے وابستہ ملازمین نے شرکت کی۔
ملازمین نے جامع ملازمت پالیسی، ملازمت کا تحفظ، سبکدوشی و سماجی تحفظ کی سہولیات، تمام اہل ملازمین کے لیے ای پی ایف، محروم رہ جانے والے ملازمین کے لیے لائلٹی فوائد اور دیگر دیرینہ مطالبات حل کرنے کا مطالبہ دہرایا۔ ایسوسی ایشن کے چیف ترجمان ڈاکٹر حامد پرے نے کہا کہ ساتویں روز بھی ملازمین کی بڑی تعداد میں شرکت ان کے اتحاد اور اپنے مستقبل کو محفوظ بنانے کے عزم کی عکاس ہے۔ انہوں نے کہا کہ این ایچ ایم ملازمین نے برسوں تک دشوار گزار اور دور دراز علاقوں میں خدمات انجام دی ہیں اور اب وہ محفوظ اور باوقار مستقبل کا مطالبہ کر رہے ہیں۔