تاثیر 21 ستمبر ۲۰۲۶:- ایس -ایم- حسن
نئی دہلی، 21 ستمبر: کانگریس کے جنرل سکریٹری جے رام رمیش نے الزام لگایا کہ ملک میں خوراک اور ضروری اشیاء کی قیمتوں میں مسلسل اضافے کے باوجود مودی حکومت مہنگائی پر خاموش ہے۔ انہوں نے کہا کہ دالوں، مصالحوں، خوردنی تیل اور پیاز کی بڑھتی ہوئی قیمتوں نے غریب اور متوسط طبقے کے خاندانوں کی پریشانیوں میں اضافہ کیا ہے۔ رمیش نے حکومت سے مطالبہ کیا ہے کہ وہ مہنگائی پر فوری سخت کارروائی کرکے عام لوگوں کو راحت فراہم کرے۔
پیر کو رمیش نے ایکس پر دعوی کیا کہ پچھلے ایک مہینے میں مصالحوں کی قیمتوں میں 10 سے 25 فیصد اضافہ ہوا ہے۔ انہوں نے کہا کہ چھوٹی الائچی 4,000 روپے سے بڑھ کر 4,400 روپے، بڑی الائچی 2,400 روپے سے بڑھ کر 2,800 روپے، زیرہ 360 روپے سے بڑھ کر 400 روپے اور جاوتری 2,500 روپے سے بڑھ کر 3,000 روپے فی کلو ہو گئی ہے۔