تاثیر 27 ستمبر ۲۰۲۶:- ایس -ایم- حسن
کانپور دیہات، 27 ستمبر: اتر پردیش کے کانپور دیہات میں میتھا تحصیل کے تحت نول گاؤں میں ہفتہ اور اتوار کی درمیانی شب بارش کے دوران ایک کچا مکان اچانک منہدم ہو گیا۔ ملبے میں دب کر گھر کے اندر سو رہی 75 سالہ شانتی دیوی اور ان کی 28 سالہ بیٹی شالو کی موت ہو گئی۔
شیولی کوتوال امرندر بہادر سنگھ نے بتایا کہ مہلوکہ شالو پیشے سے وکیل تھیں۔ آس پاس کے لوگوں کے مطابق، دیر رات مکان گرنے کی تیز آواز سنتے ہی وہ شالو کے گھر کی طرف دوڑے۔ پولیس کو اطلاع دیتے ہوئے امدادی اور بچاؤ کا کام شروع کیا گیا۔ موقع پر پہنچی پولیس نے مقامی باشندوں کی مدد سے ملبے کے نیچے دبی ماں اور بیٹی کو باہر نکالا، لیکن اس وقت تک دونوں کی موت ہو چکی تھی۔
اہل خانہ نے بتایا کہ شالو اپنی ماں کے ساتھ آبائی کچے مکان میں رہ رہی تھیں۔ ان کے دو بھائی الگ الگ مکانات میں رہتے ہیں۔ مہلوکہ کے بھائی راجیش نے الزام لگایا کہ خستہ حال مکان کے سلسلے میں پہلے کئی مرتبہ گاؤں کے پردھان سے شکایت کی گئی تھی، لیکن کوئی شنوائی نہیں ہوئی۔ واقعے کے وقت راجیش رائے بریلی میں تھے۔