تاثیر9 اکتوبر ۲۰۲۶:- ایس -ایم- حسن
ممبئی، 9 اکتوبر:ممبئی کے پووئی علاقے میں واقع انڈین انسٹی ٹیوٹ آف ٹیکنالوجی یعنی آئی آئی ٹی بامبے کے ہاسٹل نمبر 6 میں جمعرات کی رات گیس سلنڈر کے پائپ سے گیس لیک ہونے کے باعث آگ لگ گئی۔ اس حادثے میں 2 بچوں سمیت 5 افراد جھلس کرزخمی ہوگئے۔ تمام زخمیوں کو اسپتال میں داخل کرایا گیا ہے اور ڈاکٹروں کے مطابق فی الحال سبھی کی حالت مستحکم ہے۔ آگ پرجمعہ کی صبح قابو پالیا گیا، جبکہ جائے حادثہ پرٹھنڈا کرنے کا کام جاری تھا۔ پووئی پولیس نے واقعے کی تحقیقات شروع کردی ہیں۔
پووئی پولیس کے ایک افسر نے جمعہ کو بتایا کہ جمعرات کی رات آئی آئی ٹی بامبے کے ہاسٹل نمبر6 میں گیس سلنڈر سے منسلک پائپ سے اچانک گیس کا اخراج شروع ہوگیا۔ اس کے بعد آگ بھڑک اٹھی، جس کی زد میں آس پاس موجود 5 افراد آگئے۔ حادثے میں زخمی ہونے والوں کی شناخت انش اہروار عمر 12 سال، تہذیب عالم عمر 9 سال، ایشور سنگھ عمر 37 سال، شیوکمار سنگھ عمر 34 سال اور انیل کمار یادو عمر 23 سال کے طور پر ہوئی ہے۔ ان میں 2 بچے اور 3 بالغ افراد شامل ہیں۔آگ لگنے کے بعد تمام زخمیوں کو فوری طور پر ابتدائی علاج کے لیے ممبئی کے راجاواڑی اسپتال منتقل کیا گیا۔ وہاں طبی جانچ اور ابتدائی علاج کے بعد 4 زخمیوں کو مزید علاج کے لیے کستوربا اسپتال بھیج دیا گیا، جبکہ ایک زخمی کا علاج راجاواڑی اسپتال میں ہی جاری ہے۔ ڈاکٹروں کے مطابق تمام 5 زخمیوں کی حالت فی الحال مستحکم ہے۔ تاہم اصل رپورٹ میں یہ واضح نہیں کیا گیا ہے کہ کس زخمی کو راجاواڑی اسپتال میں رکھا گیا ہے اورکن 4 افراد کوکستوربااسپتال منتقل کیا گیا ہے۔ اسی طرح زخمیوں کے جھلسنے کی شدت کے بارے میں بھی تفصیلات فراہم نہیں کی گئی ہیں۔