نشانت کمار کی پہلی دربھنگہ آمد پر عوام کا سیلاب، نظرعالم نے چاندی کا تاج پہناکر کیا شاندار استقبال

راج ریزورٹ میں اساتذہ اور گریجویٹ ووٹروں سے این ڈی اے رہنماؤں کا مکالمہ، ڈاکٹر گھَنشیام رائے اور سرویش کمار کو بھاری ووٹوں سے کامیاب بنانے کی اپیل

دربھنگہ،(فضاامام): جنتادل یونائیٹڈ کے سینئر رہنما محترم نشانت کمار کی پہلی دربھنگہ آمد پر ہفتہ کے روز این ڈی اے کارکنان اور حامیوں میں زبردست جوش و خروش دیکھا گیا۔ سوبھن چوک پر ہزاروں کارکنان نے ڈی جے، نقاروں اور پھولوں کی بارش کے ساتھ ان کا شاندار استقبال کیا۔ اس موقع پر بڑی تعداد میں کارکنان اور گاڑیوں کا قافلہ موجود تھا۔ اس کے بعد ایکمی گھاٹ واقع راج ریزورٹ میں منعقدہ عوامی رابطہ اجلاس میں اساتذہ اور گریجویٹ ووٹروں کے ساتھ این ڈی اے رہنماؤں اور کارکنان نے آئندہ بہار قانون ساز کونسل انتخابات میں دونوں امیدواروں کی کامیابی یقینی بنانے کا عزم ظاہر کیا۔نشانت کمار کی دربھنگہ آمد پر جے ڈی یو رہنما اور آل انڈیا مسلم بیداری کارواں کے قومی صدر نظرعالم نے انہیں چاندی کا تاج پہنا کر اعزاز سے نوازا۔ اس کے ساتھ ہی بہار کے مردِ ترقی نتیش کمار، نشانت کمار اور جے ڈی یو کے قومی کارگزار صدر و راجیہ سبھا رکن پارلیمنٹ سنجے کمار جھا کی تصاویر پر مشتمل ایک خوبصورت فوٹو فریم بھی پیش کیا۔ اس موقع پر نظر عالم نے نشانت کمار کا استقبال کرتے ہوئے ان کے روشن مستقبل کے لیے نیک خواہشات کا اظہار کیا اور امید ظاہر کی کہ بہار میں ترقی اور عوامی فلاح و بہبود کے کاموں کو مزید آگے بڑھایا جائے گا۔ایکمی گھاٹ واقع راج ریزورٹ میں منعقدہ عوامی اجلاس کی صدارت دربھنگہ دیہی حلقے کے رکن اسمبلی اور جنتا دل یونائیٹڈ کے ضلعی صدر راجیش کمار عرف ایشور منڈل نے کی۔ اجلاس میں این ڈی اے کی مختلف اتحادی جماعتوں کے سینئر رہنماؤں، عوامی نمائندوں، کارکنان اور حامیوں نے بڑی تعداد میں شرکت کی۔ پروگرام کا بنیادی مقصد دربھنگہ اساتذہ حلقے سے جے ڈی یو امیدوار ڈاکٹر گھَنشیام رائے اور گریجویٹ حلقے سے این ڈی اے کے حمایت یافتہ امیدوار سرویش کمار کی کامیابی یقینی بنانے کے لیے ووٹروں سے حمایت کی اپیل کرنا تھا۔ دونوں امیدوار این ڈی اے کے حمایت یافتہ امیدوار ہیں۔اجلاس سے خطاب کرتے ہوئے مہمانِ خصوصی نشانت کمار نے اساتذہ اور گریجویٹ ووٹروں سے دونوں امیدواروں کو بھاری ووٹوں سے کامیاب بنانے کی اپیل کی۔ انہوں نے بہار میں گزشتہ دو دہائیوں کے دوران ہونے والے ترقیاتی کاموں کا ذکر کرتے ہوئے کہا کہ نتیش کمار کی قیادت میں ریاست میں ترقی اور عوامی فلاح و بہبود کے شعبوں میں نمایاں تبدیلیاں آئی ہیں۔ انہوں نے اپنے والد نتیش کمار کے کاموں اور ترقی کے تئیں ان کی وابستگی کا ذکر کرتے ہوئے کہا کہ بہار کو ایک ترقی یافتہ ریاست بنانے کی سمت میں جاری کوششوں کو آگے بڑھانا ضروری ہے۔ انہوں نے ووٹروں سے اپیل کی کہ وہ ترقی کے کاموں کو مدنظر رکھتے ہوئے این ڈی اے امیدواروں کی حمایت کریں۔جے ڈی یو کے قومی کارگزار صدر اور راجیہ سبھا رکن پارلیمنٹ سنجے کمار جھا نے بھی اجلاس سے خطاب کرتے ہوئے دونوں امیدواروں کی کامیابی پر اعتماد ظاہر کیا۔ انہوں نے این ڈی اے کارکنان کے جوش و خروش کی ستائش کرتے ہوئے کہا کہ 2025 کے اسمبلی انتخابات میں این ڈی اے کو ملا وسیع عوامی مینڈیٹ نتیش کمار کے ترقیاتی ماڈل پر عوام کے اعتماد کا مظہر ہے۔ انہوں نے امید ظاہر کی کہ اساتذہ اور گریجویٹ ووٹر قانون ساز کونسل انتخابات میں بھی ڈاکٹر گھَنشیام رائے اور سرویش کمار کو بھاری ووٹوں سے کامیاب بنا کر ایوان میں بھیجیں گے۔ اپنے خطاب کے دوران انہوں نے اپوزیشن جماعتوں کی سیاسی حکمت عملی پر بھی تنقید کی۔اجلاس میں بی جے پی کے ریاستی صدر اور دربھنگہ شہری حلقے کے رکن اسمبلی سنجے سراوگی، بہار حکومت کے وزیر مدن سہنی، قانون ساز کونسل کی رکن بھارتی مہتا، سابق وزیر و ایم ایل سی ہری سہنی، رکن اسمبلی ونئے کمار چودھری، رکن اسمبلی اتیریک کمار، سابق رکن اسمبلی پون جیسوال، دلیپ چودھری سمیت این ڈی اے کی مختلف اتحادی جماعتوں کے متعدد رہنما موجود تھے۔مقررین نے کہا کہ اساتذہ اور گریجویٹ حلقوں کے نمائندوں کا کردار انتہائی اہم ہے۔ دونوں امیدواروں کے منتخب ہونے سے اساتذہ اور گریجویٹ ووٹروں کے مسائل کو قانون ساز کونسل میں مضبوطی کے ساتھ اٹھانے اور ان کے حل کے لیے مؤثر کوششیں کرنے کا موقع ملے گا۔ رہنماؤں نے ووٹروں سے متحد ہو کر این ڈی اے امیدواروں کے حق میں ووٹ دینے کی اپیل کی۔اس موقع پر نظرعالم، قدوس ساگر، ذکی احمد، ضمیر خان، اشرف احمد، حافظ ابو شہامہ، صلاح الدین، شمس عالم، ابرار احمد، معراج عالم گڈو، نصر سوبھن، تنویر عالم، ڈاکٹر ناہید مشتاق، معشوق اقبال، سرفراز، مدن کمار منڈل، ارون کمار، پنکج کمار، حبیبِ اصغر، دیانند، مراری موہن مشرا اور پردیپ جی سمیت بڑی تعداد میں این ڈی اے کارکنان اور حامی موجود تھے۔ پورے پروگرام کے دوران کارکنان میں زبردست جوش و خروش دیکھا گیا۔ اجلاس کے ذریعے این ڈی اے رہنماؤں نے دونوں امیدواروں کی کامیابی یقینی بنانے اور بہار میں ترقی کی رفتار کو مزید تیز کرنے کے عزم کا اظہار کیا۔